گه‌ڕان

Shadow Shadow
سیاسه‌تی

لەسەر بۆردومانکردنى فڕۆکەخانەى بەغدا و و ناوچەى سەوز قسەدەکات 

خەزعەلی: كازمی یەكەم سەرۆك وەزیرانە گروپە چەکدارە عێراقییەکان دەکاتە ئامانج

2020.06.27 - 08:57
خەزعەلی: كازمی یەكەم سەرۆك وەزیرانە گروپە چەکدارە عێراقییەکان دەکاتە ئامانج

ناس کورد-

 

فەرماندەی عەسائیبی ئەهلی هەق لەعێراق ڕایدەگەیەنێت، بۆردومانە موشەكییەكان بۆ سەر فڕۆکەخانەى بەغدا و ناوچەی سەوز دامەزراوەکانى عێراق ناكەنە ئامانج، بەڵكو دژى ئەمریكییەکانە و كازمیش یەكەم سەرۆك وەزیرانە کە گروپە چەكدارەكان دەکاتە ئامانج.

 

لەگرتەیەكی ڤیدیۆیدا، قەیس خەزعەلی فەرماندەی عەسائیبی ئەهلی هەقی عێراق ڕایگەیاندووە، بەپێی شەریعەتی ئاسمانیی و یاساكان، لەسەر گروپە بەرگریکارەکانى عێراق پێویستە بەرەنگاری هێزە داگیركارەكانی وڵات بنەوە.

 

ئاماژەی بۆ ئەوەشكردووە، گروپەکان عێراقیەكان و دەزگاكان ناكەنە ئامانج لەو هێرشانەی كە دەیكەنە سەر ناوچەی سەوز بەڵكو ئەمریكییەكان و باڵیۆزخانەكەی دەكەنە ئامانج.

 

لەبارەی ڕوداوەكەی شەوی هەینیەوە بۆ سەر چەند گروپ و سەكردەیەكی حەشدی شەعبی، خەزعەلی دەڵێت، هەوڵێكی دەرەكی هەیە بۆ لێدان لەحەشدی شەعبی.

 

خەزعەلى هەروەها دەستگیركردنی ژمارەیەك كەسی سەر بەحەشد لەلایەن دژە تیرۆرەوە بەپشێوی نانەوە دادەنێت و دەڵێت ئەوەی شەوی ڕابردوو بۆ سەر حەشدی شەعبی ڕوویدا ڕوداوێكی ترسناكە.

 

فەرماندەكەی عەسائیب باسی لەوەشكردووە، نە سەرۆك وەزیران و نە ئەوانی دیكەش ناتوانن ڕوبەڕووی حەشدی شەعبی ببنەوە دەزگای دژە تیرۆریش دەزگایەكی نیشتیمانیەوە و شانبەشانی حەشد شەڕی تیرۆری كردووە و دەبێت ئەو كارە لەلایەن سەرۆكی دەستەی حەشدی شەعبیەوە چارەسەر بكرێت.

 

خەزعەلی وتووشیەتی، مستەفا كازمی یەكەم سەرۆك وەزیرانە گروپە بەگریکارەکانى كردووەتە ئامانج و سەرۆكەكانی پێشوو ئەو كارەیان نەكردووە.