گه‌ڕان

Shadow Shadow
سیاسه‌تی

نوێنەرایەتی ڕۆژئاوا: مەزڵوم کۆبانی سەلامەتە و بەهیچ شێوەیەک ئەمڕۆ لە هەرێم نەبووە

2020.06.25 - 22:07
نوێنەرایەتی ڕۆژئاوا: مەزڵوم کۆبانی سەلامەتە و بەهیچ شێوەیەک ئەمڕۆ لە هەرێم نەبووە

ناس کورد-

ئەندامێکی نوێنەرایەتی كانتۆنەكانی ڕۆژئاوا لە هەرێمی کوردستان ڕەتیدەکاتەوە بۆردومانەکەی ئەمڕۆی تورکیا بە ئامانجگرتنی مەزڵوم کۆبانی بوبێت و جەنەڕاڵەکەی ڕۆژئاوا لە هەرێم بوبێت، ڕۆژنامەنوسێکی نزیک لە پەکەکەش دەڵێت، دیدارەکە ئەمڕۆ نەبووە و ناوەڕۆکەکەشی ئاشکرادەکات.

 

ئەمڕۆ پێنجشەممە 25ی حوزەیرانی 2020، لە تویتێکدا مەزڵوم عەبدی، فەرماندەی هێزەکانی سوریای دیموکرات گفتویەکی خۆی و لاهور شێخ جەنگی، هاوسەرۆکی یەکێتی بڵاوکردەوە، دواتر و لەگەڵ بۆردومانی تورکیا لە سنوری شارباژێڕ لە سلێمانی، دەنگۆی ئەوە بڵاوبوویەوە کە "مەزڵوم عەبدی لە هەرێمی کوردستان بووە و ئەو ئامانجی بۆردومانەکە بووە".

 

جاویدان حەسەن، ئەندامی نوێنەرایەتی كانتۆنەكانی ڕۆژئاوا لە هەرێمی کوردستان بە ناس کوردی ڕاگەیاند: "ئەو پەیوەندی و گفتوگۆیانەی جەنەڕاڵ مەزڵوم عەبدی لەگەڵ بەرپرسانی هەرێمی کوردستان بەردەوام هەبووە و شتێکی تازە و نامۆ نییە".

 

ئەو هەرچەندە ئاماژەی بەشوێن و کاتی دیدارەکە نەکرد، بەڵام جەختیکردەوە: "ئەمڕۆ بەهیچ شێوەیەک مەزڵوم عەبدی لە هەرێمی کوردستان نەبووە و بۆردومانەکەی تورکیاش بە ئامانجگرتنی ئەو نەبووە".

 

ئەو بەرپرسەی ڕۆژئاوا لە هەرێمی کوردستان دوپاتیکردەوە: "جەنەڕاڵ مەزڵوم عەبدی سەلامەتە".

 

هاوکات سەڵاح خدر، ڕۆژنامەنوسی نزیک لە پارتی کرێکارانی کوردستان (پەکەکە) بە ناس کوردی وت: "ئەو دیدارە ئەمڕۆ نەبووە و پشتر کراوە، بەڵام ئەمڕۆح بڵاوکراوەتەوە".

 

سەبارەت بە ناوەڕۆکی دیدارەکەش ئاماژەی بەوەکرد: "لەماوەی ڕابردوودا نزیکبوونەوەی ئەنەکەسە و حزبەکانی رۆژئاوا لەیەکتر و سوپاسکردنی هەندێک لایەنی هەرێم، نیگەرانی هەندێک لایەنی لێکەوتبووەوە، بۆیە، گفتوگۆی مەزڵوم عەبدی و لاهور شێخ جەنگی لەسەر ئەو پرسە بووە و بۆ ڕەوینەی ئەو نیگەرانیانە".

 

ئەو ڕۆژنامەنوسەی نزیک لە پەکەکە باسی لەوەشکرد: "پێموایە ئەو بۆردومانەی ئەمڕۆی تورکیا لە سلێمانی، پەیامێک بوو بۆ بەرپرسانی سلێمانی و ئەو جموجوڵانەی کە لەو ناوچەیە هەن، کە بۆ تورکیا دهۆک و هەولێر و سلێمانی جیاوازییان نییە".

 

ئاماژەی بەوەشکرد: "ئەو هێرشانە کۆتاییان نایەت و بەردەوام دەبن، تاوەکو حکومەتی هەرێمی کوردستان کاردانەوەیەکی جدی و کرداری نەبێت، بەرامبەر تورکیا و هەڵوێستی نیشتیمانی دەرنەبڕێت".