گه‌ڕان

Shadow Shadow
سیاسه‌تی

كرێكارێكی ئاسایی دۆزینەوەى دوو بەردی گرانبەها دەیكاتە خاوەن زیاتر لە 3 ملیۆن دۆلار

2020.06.25 - 11:53
كرێكارێكی ئاسایی دۆزینەوەى دوو بەردی گرانبەها دەیكاتە خاوەن زیاتر لە 3 ملیۆن دۆلار

ناس کورد- 

كرێكارێكی ئاسایی تەنزانیا دوای دۆزینەوەی دوو بەردی گرانبەها بووە ملیۆنێر و ئاماژە بەوە دەکات کە بە پارەکە بازاڕ و قوتابخانە دروست دەکات و پارەکەش هاوکارییەکى باشى دەکات بۆ یارمەتیدانى لە بەخێوکردنى 30 منداڵەکەى. 

 

ڕۆژنامەی گاردیانی بەریتانی بڵاوی كردەوە، كرێكارێكی كانزاكانی وڵاتی تەنزانیا  بەناوی سانینیۆلایزر دوو بەردی  دەگمەنی گرانبەهای لەجۆری تەنزانێت دۆزیوەتەوە كە ڕەنگەكانی شین و وەنەوشەین و نرخیان 3 ملیۆن و 300 هەزار دۆلار بووە و ەزارەتی كانزاكان بەو پارەیە لێیكڕیووەتەوە.

 

كێشی هەردوو بەردەكە نزیكەی 15 كیلۆ گرامە و تەنها لە باكووری تەنزانیا هەیە كە دەكەوێتە باشووری كیشوەری ئەفریقیاوە و بەوتەی شارەزایانیش چەند ساڵێكی تر جۆری ئەو بەردە لەسەر زەوی نامێنێت و لەناو دەچن.

 

ساڵی پار تەنزانیا ناوەندێكی بازرگانی دروستكرد بۆ ڕێگەدان بەو كرێكارانەی كە سەر بەهیچ كۆمپانیایەك نین بەردی گرانبەها و ئاڵتون بەحكومەت بفڕۆشن.

 

دوای ڕوداوەكەش لایزر لەسەر كەناڵی فەرمیی تەنزانیا بەدەركەوت وەكو ئەو كەسەی كە بووەتە خاوەنی دەستكەوتێكی گرانبەها بەبڕی زیاتر لە 3ملیۆن دۆلار دوای ئەوە بانكێكی حكومی بەردەكانی لێكڕیوەتەوە و هاوكات لەلایەن سەرۆكی ئەو وڵاتەوە پەیوەندیەكی تەلەفۆنی پێگەیشتووە و پیرۆزبایی لێكردووە.

 

لایزر كە باوكی زیاتر لە 30 منداڵە بەبی بی سی ڕاگەیاندووە، بە بۆنەی گەیشتن بە خەونەکەى ئاهەنگێكی گەورە ساز دەكات.

 

كرێكارەکە باسی ئەوەشى كردووە دەیەوێت بەو پارەیە سەرباری بەخێوكردنی منداڵەكانی بازاڕێكیشی پێ دروست بكات.

 

میدیاكان باسیان لەوەش كردووە، لایزر خەمی كۆمەڵگەی لەبیر ناكات و توشیەتی، دەیەوێت قوتابخانەیەك لەنزیكی ماڵەوەیان دروست بكات و ئەو خوێنەواری نیە بەڵام چەندین خێزانی هەژار هەن ناتوانن خەرجی منداڵەكانیان بۆ خوێندن دابین بكەن ئەو هاریكارییان دەكات.

 

بەگوێرەى وتەبێژی وەزارەتی كانزاكانی ئەو وڵاتە ئەو دوو پارچە بەردە گرانبەهایە لە سەرەتای پرۆسەی گەڕان و پشكنینكدا بووە كە بۆ ناوچەكە ئەنجامدراوە و ئەو كرێكارەش توانیوییەتی ئەو دوو بەردە بدۆزێتەوە.