گه‌ڕان

Shadow Shadow
سیاسه‌تی

ئێران هەڕەشەی ئەنجامدانی ئۆپراسیۆن لە سنوری هەرێمی کوردستان دەکات و هێزی کۆکردووەتەوە

2020.06.23 - 17:00
ئێران هەڕەشەی ئەنجامدانی ئۆپراسیۆن لە سنوری هەرێمی کوردستان دەکات و هێزی کۆکردووەتەوە

ناس کورد-

محەمەد پاکپور، فەرماندەى گشتی سوپای پاسداران دەستپێکردنی قۆناغی کۆتایی مانۆڕێکی سەربازیی لە سنورەکانی ئێران لەگەڵ هەرێمی کوردستان ڕاگەیاند و دەڵێت، "دژە شۆڕش و پشتگیریکارانی ئەوانیش دەزانن کە ئێمە لەبارەى پاراستنی ئاسایش و سەقامگیری گەل و سنوری ئێران گاڵتەمان لەگەڵ کەسدا نییە."

 

محەمەد پاکپور وتیشی، لەدوای کۆتاییهاتنی مانۆڕەکە هێزە و بنکە سەربازییەکانیان لەسەر ناوچەکانی پارێزگای کوردستانی ئێران (مەریوان و ناوچە سنورییەکان لەگەڵ هەرێم) جێگیر دەکەن.

 

وتیشی، یەکەکانەی ناوچەکە، سوپای 22ی بەیتولمەقدیس، بەشێک لە سوپای شارەکانی مەریوان و دیواندەرە و چەند یەکەیەکی تۆپخانەکان بەشدارییان لە مانۆڕەکە کردووە و بەردەوام دەبن لە پاراستنی ناوچەکە.

 

پاکپور وتیشی، ناوچەی ئەو مانۆڕەی تێدا ئەنجام درا هاوسنورە لەگەڵ هەرێمی کوردستانی عێراق و دەکرێت "تیرۆرستان" لەو جوگرافیایە سود وەرگرن و تێیدا بمێننەوە، ڕوبەڕوبوونەوەى ئەوانیش یەکێک دەبێت لە کارە گرنگەکانی ئەو هێزەى لە ناوچەکە جێگیر دەکرێت.

 

وتیشی، لە ساڵانی ڕابردوودا چەند ئۆپراسیۆنێکمان بۆ پاککردنەوەى ناوچەکە لە "تیرۆرستان و هاوکارانیان" ئەنجامدا و بەردەوامیش دەبین لە ڕوبەڕوبوونەوەیان.

 

پاکپور جەختیکردەوە کە لە ساڵانی ڕابردوودا بە هێرشی موشەکی هێرشیان کردووەتە سەر بارەگای ئەو هێزانە لە کۆیە و هەر جموجوڵێکی ئەوانیش ببینین ئەوە وەڵامی توندیان دەدەینەوە.

 

وتیشی، بەرپرسانی هەرێمی کوردستان و دۆستانی عێراق دەبێت سنورەکانی خۆیان بپارێزن و ڕێگری لە بەکارهێنانی ئەو ناوچانە بکەن لەلایەن گروپە چەکدارەکانەوە.

 

جەختیکردەوە کە ئامۆژگاری "خەڵک و عەشایەری باکوری عێراقیش دەکەین ئەو گروپە چەکدارییانە لە سنورەکانیان بەدەر بنێن و ئەگەریش نەتوانن ئەوە دور بکەونەوە لێیان چونکە دەبنە ئامانجی هێرش و بۆردومانەکانمان."