گه‌ڕان

Shadow Shadow
سیاسه‌تی

لەبارەى لەشکرکێشییەکەى تورکیا

عێراق ناوەڕۆکی ئەو یاداشتنامە ناڕەزایەتییەى ئاشکرا کرد کە بە ’’زمانێکی توند’’ ئاڕاستەى تورکیای کردووە

2020.06.21 - 14:32
عێراق ناوەڕۆکی ئەو یاداشتنامە ناڕەزایەتییەى ئاشکرا کرد کە بە ’’زمانێکی توند’’ ئاڕاستەى تورکیای کردووە

ناس کورد-

وەزارەتی دەرەوەی عێراق ڕایگەیاند، یاداشتنامەیەکی توندی ئاڕاستەی تورکیا کردووە کە تێیدا هۆشداری دراوە بەو وڵاتە کە دەبێت کێشەکان لە چوارچێوەی یاسا و ڕێکارە دبلۆماتییەکان چارەسەر بکرێن، نەک لەڕێگەی کردەی سەربازی تاک لایەنەوە.

 

ئەمڕۆ یەکشەممە، 21ى حوزەیرانی 2020، ئەحمەد سەحاف، وتەبێژی وەزارەتی دەرەوەی عێراق بە ئاژانشی فەرمی عێراقی ڕاگەیاند: "فاتح یلدز، باڵوێزی تورکیایان لە بەغدا بانگهێشتکردووە و یاداشتنامەیەکی توندئامێزیان داوەتێ، تێیدا عێراق دووپاتیکردووەتەوە کە پابەندە بە پرنسیپەکانی بەرگریکردن لە سەروەری و یەکگرتووی خاکەکەی".

 

بە وتەی سەحاف، یاداشتنامەکەدا جەختی لەوە کردووەتەوە کە "عێراق مافی ئەوەی هەیە داوا لەکۆمەڵگای نێودەوڵەتی و ئەنجومەنی ئاسایشی نێودەوڵەتی بکات لەو پرسەدا داکۆکی لێبکەن و هاوکاری بکەن".   

 

 وتەبیژی وەزارەتی دەرەوەی عێراق ڕوونیکردوەتەوە: "عێراق بە هیچ شێوەیەک ڕێگە نادات خاکەکەی وەک ڕێڕەویەک بۆ زیانگەیاندن بەهەر وڵات و لایەنێکی دیکە بەکاربهێنرێت و دەبێت پەیوەندییە مێژووییەکانی نێوان عێراق و تورکیا ببێت بە هەوێنی  چارەسەرکردنی کێشەکانی نێوان هەردوو وڵات". 

 

 سەحاف ئەوەشی دووپاتکردوەتەوە کە "تورکیا ئاگادارکراوەتەوە، ئەنجامدانی کردەی سەربازی لەسەر سنورەکانی نێوان هەردوولا بەبێ هەماهەنگی لەگەڵ عێراقدا کارێکی ڕەتکراوەیە، دەبێت گرژییەکان لەڕێگەی چارەسەری گونجاو بە پشتبەستن بە یاسا و رێسا نێودەوڵەتییەکان چارەسەر بکرێن".  

 

دەشڵێت، عێراق ئامادەیە هەماهەنگی بکات لە بەرقەراکردنی ئاسایش لەسەر هێڵە سنورییەکانی نێوان خۆی و وڵاتانی دراوسێی.

 

ماوەی چەند ڕۆژێکە تورکیا بە بیانووی بوونی گەریلاکانی پارتی کریکارانی کوردستان (پەکەکە) دەستی کردووە بە هێرشکردنە سەر خاکی هەرێمی کوردستان و فڕۆكە جەنگییەكانی بەردەوامن لە بۆردومانکردنی ناوچەكانی سنوری ئاكرێ و ئامێدی.

 

بەربەیانی ڕۆژی چوارشەممەی ڕابردووش هێزێکی کۆماندۆی بەقوڵایی 10 کیلۆمەتر هاتنە ناو خاکی هەرێمی کوردستانەوە، لە ئاکامی لەشەرکێشییەکانی تورکیا کە تائێستا بەردەوامی هەیە دەیان هاوڵاتی سیڤیلی هەرێمی کوردستان کوژراون و برینداربوون  و دەیان گوندی ناوچەکەش توشی زیان بووە و خەڵەکەکەی دوچاری ئاوارەبوون بووەنەتەوە.