گه‌ڕان

Shadow Shadow
سیاسه‌تی

پسپۆڕان هۆشداریدەدەن...زیاتر لە ملیۆنێک کەس ساڵی 2022 بەهۆی کۆرۆناوە دەمرن  

2020.06.20 - 08:36
پسپۆڕان هۆشداریدەدەن...زیاتر لە ملیۆنێک کەس ساڵی 2022 بەهۆی کۆرۆناوە دەمرن  

ناس کورد-

 

شارەزایانی پزیشكی گەشبین نین بەدۆزینەوەی بەمنزیكانەی ڤاكسین بۆ كۆرۆنا، ژمارەیەكیان جەخت لەسەر خۆگونجاندن لەگەڵ دۆخەكەدا دەکەن، شارەزایەكیش هۆشداری مردنی زیاتر لەیەك ملیۆن کەس لەساڵی داهاتوودا بەهۆی ڤایرۆسەكەوە دەدات.

 

 

پزیشكێكی پسپۆڕ لەنەخۆشییە گوازراوەكان لەزانكۆی دیوك دەڵێت، خەڵكی ماندووە و بەهەڵە لەو باوەڕەدان قەیرانەكە كۆتایی دێت، دەبێت خۆیان لەگەڵ ژیانكردن لەگەڵ ئەو دۆخەدا ڕابهێنن.

 

بەپێی ڕاپۆرتێكی بلۆمبێرگ، شارەزایانی بوارەكە بەدووری دەزانن ڤاكسینی دژە كۆرۆنا پێش هاتنی ساڵی نوێ بدۆزرێتەوە و لەوانەیە دوای ئەو ماوە بەردەست بێت، ئەوەش بەو واتایە دێت كە دەبێت خەڵكی خۆیان لەگەڵ بارودۆخی نوێ پەتاكەدا بگونجێنن.

 

ئەدا ئەدیمۆرا، مامۆستای بواری نەخۆشیە گوازراوەكان لەكۆلیژی نۆرس كارۆلینا دەڵێت، لەوە تێدەگەن دەبێت هاوسەنگی دۆخەکە ڕابگیرێت بەهۆی باری ئابوورییەوە، بەڵام گەیشتوونەتە ئەو ڕادەیەی كۆمەڵگە چالاكیەكانی دەستپێبكاتەوە و خەڵكی بچنە دەرەوە بۆ شوێنە گشتیەكان.

 

لای خۆشیەوە، ئامیش ئەداجالا شارەزای بوارەكە لەزانكۆی هۆبكنزی ئەمریكا ڕایگەیاندووە، هیچ چالاكیەكی بەدەر لەمەترسییەكانی ڤایرۆسی كۆرۆنا نییە بەڵام كارەكە لەسەر ڕادەی مەترسییەكە بەلای خەڵكەوە وەستاوە.

 

هاوكات سیس برێكلی سەرۆكی جێبەجێكاری كۆمپانیای جاڤی بۆ ڤاكسینەكان ڕایگەیاندووە، ئێستا ڕوونە ڤایرۆسەكە كۆتایی نەهاتووە ئەوان پێویستیان بەهەندێك لەخۆبردووی هەیە بۆ چۆنیەتی بەڕێكردنی دۆخەكە لەداهاتوودا و گەر بیانەوێت دەرگای چالاكییەكان بەتەواوەتی بكەنەوە ئەوا ڤایرۆسەكەش زیاتر تەشەنە دەسەنێت.

 

چەند شارەزایەكی دیكە پێشبنی ئەوە دەكەن مردن بەهۆی ڤایرۆسەكەوە لەجیهاندا بگەنە ملیۆنێك حاڵەت، لەوانە ئەریك تۆبۆل بەڕێوەبەری پەیمانگای سكرێبس لەكالیفۆرنیا دەڵێت، تووشی شۆك نابن گەر بێت و لەساڵی 2022 ژمارەی مردووان بەهۆی ڤایرۆسەكەوە بگاتە ملیۆنێك یاخود زیاتر وەكو دەشزانرێت چەندین كەس زیاتر ڕوبەڕووی مەترسیەكان دەبنەوە.

 

لەلایەكی تریشەوە، دەیڤید هامر مامۆستا لەكۆلێژی پزیشكی بۆستنی ئەمریكا ڕایگەیاندووە، ترس هەیە لەدەستپێكردنەوەی چالاكییە ئابورییەكان لەچەند مانگی داهاتوودا و كاتەكەش زیاتر مایەی نیگەرانیە لەوەرزی پایزدا، كاتێك زانكۆكان دەكرێنەوە و كارەكان دەستپێدەكەنەوە، بەتایبەت كە پلەی گەرماش نزم دەبێتەوە ئەوە كەشوهەوایەكی خراپ دەبێت بۆ گەڕانەوەی دووبارەی پەتاكە.

 

باسی لەوەشكردووە، بەرپرسان و زاناكانی ئەمریكا بەرنامەیەكی بەپەلەیان داناوە بەئامانجی دۆزینەوەی ڤاكسینەكە لەنیوەی یەكەمی ساڵی 2021 دا بەڵام ئەنتۆنی ڤۆسی ڕاوێژكاری كۆشكی سپی هۆشداری ئەوەیدا كە ئەو كارە كاتێكی زۆرتری پێویست دەبێت.