گه‌ڕان

Shadow Shadow
سیاسه‌تی

بڕیارێکی گرنگ لە حکومەتی هەرێمەوە تایبەت بە گومرگ و دەروازە سنورییەکان

2020.06.15 - 15:47
App store icon Play store icon Play store icon
بڕیارێکی گرنگ لە حکومەتی هەرێمەوە تایبەت بە گومرگ و دەروازە سنورییەکان

ناس کورد-

حکومەتی هەرێمی کوردستان بڕیاریدا سەرجەم ئەو لێخۆشبوونە گومرگییانەی کە لە دەرەوەی یاساکان دراون هەڵبوەشێنەوە و سەرۆکی حکومەت دەڵێت، چاکسازیکردن و رێکخستنەوەی داهاتە گشتییەکان، ئەرکی لە پێشینەی ئەم کابینەیەیە.

 

کەناڵی ناس کورد لە تێلیگرام جۆین بکە   

‏‎لە درێژەی کۆبوونەوەکانی تایبەت بە چاکسازیی لە داهات و سەرچاوەکانی داهاتە گشتییەکان، ئەمڕۆ (دووشەممە، 15ی حوزەیرانی 2020)، لەڕێگەی ڤیدیۆکۆنفرانسەوە، کۆبوونەوەیەکی تایبەت بە گفتوگۆکردنی دەرئەنجامی کاری لیژنەکانی تایبەت بە رێکخستنەوەی بواری گومرگ و لێخۆشبوونی گومرگی و دەروازە سنوورییەکان بە سەرپەرشتی مەسرور بارزانی، سەرۆکی حکومەتی هەرێم ئەنجامدرا.

 

‏‎بەگوێرەی ڕاگەیەندراوی کۆبوونەوەکە، لە کۆبوونەکەدا گفتوگۆ کرا دەربارەی ئەنجامی کاری لیژنەکانی تایبەت بە بواری رێکخستنەوەی بواری گومرگ و دەروازە سنوورییەکان و پێداچوونەوە بە لێخۆشبوونە گومرگییەکان وەک بەشێک لە پرۆسەی چاکسازیکردن لە داهاتە گشتییەکان.

 

‏‎ئاماژە بەوەشکراوە، لە دەستپێکی کۆبوونەوەکەدا، وەزیرانی ناوخۆ و دارایی و ئابووری وەک سەرپەرشتیارانی لیژنەکان راپۆرتەکانی خۆیان پێشکەش کرد کە تێیدا ئاماژەیاندا بەو پرۆسەی پێداچوونەوە و وردبینییەی بە سەرجەم یاسا و رێنمایی و گرێبەستەکان ئەنجامیان دابوو دوای سەردانی مەیدانیان، سەرەڕای خستنەڕووی کێشە و گرفتەکان، پێشنیارەکانی خۆشیان خستەڕوو.

 

‏‎لە ڕاگەیەندراوەکەدا ئەوەش هاتووە، سەرۆکی حکومەتی هەرێمی کوردستان ئاماژەی بە گرنگی هەردوو بابەتەکەدا و ئەوەی دووپاتکردەوە کە چاکسازیکردن و رێکخستنەوەی داهاتە گشتییەکان، ئەرکی لە پێشینەی ئەم کابینەیەیە و بابەتەکانی پەیوەست بە گومرگەکان و رێکخستنەوەی دەروازە سنوورییەکانیشی بە بەشی گرنگی ئەو چاکسازییە لە داهاتی گشتی زانی.

 

‏‎ئاماژە بەوەشکراوە، لە کۆبونەوەکەدا جەختکرایەوە لە پشتیوانی حکومەتی هەرێم بۆ کەرتی تایبەت و پاراستنی بەرهەمی خۆماڵی و برەودان بە هاوبەشی پێکردنی کەرتی تایبەت لە بووژاندنەوەی ئابووریی هەرێم و دەستخستنی هەلی کار بۆ هاووڵاتییان.

 

هاوکات، بڕیاردرا کە گشت دەروازە سنووریی و خاڵە گومرگییەکان بە پێی یاسا کارپێکراوەکان و ستانداردە نێودەوڵەتییەکان رێکبخرێنەوە و هەموو ئەو لێخۆشبوونە گومرگییانەش کە لە دەرەوەی یاساکان دراون هەڵبوەشێنەوە.

 

هەروەها سەبارەت بە گرێبەستی ئەو خزمەتگوزارییانەی لە دەروازە سنوورییەکان لەلایەن کەرتی تایبەتەوە بەڕێوە دەبرێن، لە کۆبوونەوەکە جەختکراوتەوە کە پێویستە لە نزیکترین دەرفەتدا، ئەنجامی کۆتایی وردبینی و پێداچوونەوە بە سەرجەمیان تەواو بکرێت و لە بەر رۆشنایی بەرژەوەندی گشتی و بە رەچاوکردنی یاسا و رێنماییەکان، بڕیاریان لە بارەوە بدرێت.