گه‌ڕان

Shadow Shadow
سیاسه‌تی

’’چينە دەوڵەمەندەكە حەز ناكەن خزمەتگوزاريەكانيان وەك خەڵكى ئاسايى بێت’’

پڕۆژەکانی نیشتەجێبوون گوێ بە بڕیارێکی حکومەت نادەن لەبارەى پارەی خزمەتگوزارییەکان (تایبەت)

2020.06.13 - 18:49
پڕۆژەکانی نیشتەجێبوون گوێ بە بڕیارێکی حکومەت نادەن لەبارەى پارەی خزمەتگوزارییەکان (تایبەت)

ناس کورد-

لە سەرەتاى ئەمساڵەوە حكومەتى هەرێمى كوردستان بڕياری دا خزمەتگوزارى يەكەكانى نيشتەجێبوون لە كۆمپانياكان وەربگرێتەوە و خۆى دابينى بكات بەهەمان نرخى گەڕەكە ئاساييەكان، بەڵام تائێستا ئەم بڕيارە جێبەجێنەكراوە و بەڕێوەبەری گشتی وەبەرهێنانی سلێمانيش دەڵێت، لايەنە پەيوەنديدارەكان ناچنە ژێر بارى بڕيارەكە.

 

سەبارەت بە بڕيارەكەى حكومەت كەمال سازانی، سەرۆكی ئەنجومەنی پرۆژەکانی نیشتەجێبوون لە شاری سلێمانی لە لێدوانێكدا بە ناس كوردى وت: "ئەو بڕیارە لە ئەنجومەنی وەزیرانەوە دەرچووە و لەسەر پێشنيازى دەستەی وەبەرهێنان بووە، ئێمە وەك ئەنجومەنى پڕۆژەکانی نیشتەجێبوون پێمان وايە ئەو بڕيارە پەلەكردنى پێوە ديار بوو و ديراسە نەكراو بوو".

 

باسى لەوەشكرد، حكومەت ئێستا خۆى فشارێکی زۆر و قەيرانێكى ئابورى لەسەرە، هەروەها ئەو خزمەتگوزاريانەى لەلايەن وەزارەتى شارەوانيیەوە پێشكەشى خەڵكى دەكات لە ئاستى پێويستدا نييە و هاوڵاتيانى گەڕەكەكان گلەيى زۆريان هەيە، لەبرى ئەوەى حكومەت لە كەرتى گشتيەوە بەرەو كەرتى تايبەت بڕوات هاوشێوەى يەكەكانى نيشتەجێبون خزمەتگوزارى پێشكەشى هاوڵاتيان بكات، بەپێچەوانەوە بڕيارەكەيان دابوو.

 

"وەبەرهێنان لە خانوبەرەدا ناكرێت و خانوو خۆ دەواجينى مريشك نييە زيادی بكەن"

سەرۆكی ئەنجومەنی پرۆژە نیشتەجێبونەكانی شاری سلێمانی پێشى وايە: "ئەوە حكومەتى هەرێمى توشى قەيرانێكى تر دەکات، بۆ نمونە لە سلێمانى نزيكەى 20 يەكەى نيشتەجێبونمان هەيە بە كە نزيكەى 400 بۆ 500 هەزار كەس لەو يەكە نيشتەجێبونانەدا دەژين، بۆيە ئەمەش بە هەموو خزمەتگوزاريەكانەوە لۆدێكى زۆرە كە لە سەر شانى حكومەت نەماوە".

 

ئەوەشى بۆ "ناس كورد" ئاشكرا كرد، ئێستا حكومەت بير لەوە دەكاتەوە پلانێكى تر دابنێت و باشترين هەنگاو كە نراوە ئەوەيە كە حكومەت دەستەى نيشتەجێبونى دروست كردوە، واتە لە وەبەرهێنانى وەرگرتوەتەوە، لە ياساكەى ساڵى 2006يشدا وشەى نيشتەجێبون تەنها بەيەك وشە هاتووە كە ئەويش هيچ نرخێكى نييە، هەروەها وەبەرهێنانيش لە خانوبەرەدا ناكرێت و خانوو خۆ دەواجينى مريشك نييە زيادی بكەن تا وەبەرهێنانى لەسەر بكرێت، بۆيە ئەو دەستەى دروستكراوە بەناوى دەستەى جيشتەجێبون بڕيار دەدات كە خزمەتگوزارى يەكەكانى نيشتەجێبون بگرێتە خۆى و دواتر بە پلان و بەرنامە كارى لەسەر بكات.

 

 كەمال سازانی ئەوەشى ڕونكردوەتەوە: "ئێمە لە ساڵى 2018  پێشنيازى ئەوەمان بۆ حكومەت كرد كە بەڕێوەبەرايەتى نيشتەجێبوون لە پارێزگاكانى هەرێم دروست بكات و سەرجەم يەكەكانى نيشتەجێبوون ئاڕاستەى ئەوێ بكات و پسپۆرى و كارامەيى تێدا ديارى بكات تا بتوانن چاودێرى كارى كۆمپانياكانى پێشكەشكردنى خزمەتگوزارى لە يەكەكانى نيشتەجێبون بكەن". 

 

سەبارەت بەوەى كە بۆچى تائێستا بڕيارەكە جێبەجێ نەكراوە و كۆسپەكانى بەردەمى چين، عەزیز سەعید، بەڕێوەبەری گشتیی وەبەرهێنانی سلێمانی بە ناس كوردى وت، ئەو بڕيارە لايەنە پەيوەنديدارەكان ناچنە ژێر بارى، هەروەها خەڵكەكە خۆشيان بوون بە دوو بەشەوە و ناڕەزايەتيان هەيە.

 

"چينە دەوڵەمەندەكە حەز ناكەن خزمەتگوزاريەكانيان وەك خەڵكى ئاسايى بێت"

عەزیز سەعید وتيىشى، بەشێكيان خەڵكى دەوڵەمەندن و حەز ناكەن خزمەتگوزاريەكانيان وەك خەڵكى ئاسايى بێت، هەروەها بەشێكيشيان داوا دەكەن وەك گەڕەكە ئاساييەكانى لێ بێت، بەڵام ئێستا ئێمە خەريكى پێداچوونەوەين و لەماوەى دوو ڕۆژدا دەبێت ڕاپۆرتێك بدەين بە ئەنجومەنى وەزيران لەسەر ئەو خزمەتگوزاريانە بۆ ئەوەى بزانرێت چۆنە و بەكوێ گەيشتوە، كاتى خۆشى ليژنەكارى زۆرى بۆ كرا و نرخ ديارى كرا بەڵام پێوەى پابەند نەبوون.

 

بەڕێوەبەری گشتی وەبەرهێنانی سلێمانی بۆ ناس كورد ئەوەشى ڕونكردەوە، لە هەندێك شوێن پێوەى پابەندن و هەندێك شوێنى تر كە خزمەتگوزارى بەردەوام پێشكەش دەكەن نرخەكان لەوانى تر جياوازە، جێبەجێ كردنى بڕيارەكەش ئەوە پێويستە لايەنە پەيوەنديدارەكان بچنە ژێر بارى و وەك گەڕەكە ئاساييەكانى لێ بكەن.