گه‌ڕان

Shadow Shadow
سیاسه‌تی

 ئێران زانیاری نوێ لەسەر ئەو سیخوڕە بڵاودەكاتەوە کە تۆمەتبارە بە چاودێریکردنى جموجۆڵەكانی قاسم  سولەیمانى

2020.06.13 - 14:45
 ئێران زانیاری نوێ لەسەر ئەو سیخوڕە بڵاودەكاتەوە کە تۆمەتبارە بە چاودێریکردنى جموجۆڵەكانی قاسم  سولەیمانى

ناس کورد-

 

دەسەڵاتی دادوەری ئێران ڕەتیدەكاتەوە ئەو سیخوڕەی كە بەمدواییانە سزای لەسێدارەدانی بۆ دەرچووە پەیوەندی بەكوشتنی قاسم سولەیمانیەوە هەبوبێت.

 

غوڵام حوسێن ئیسماعیلی وتەبێژی دەسەڵاتی دادوەری ئیران بەمیدیاكانی وڵاتەكەی ڕاگەیاندووە، مەحمود موسەوی مەجد كە سزای لەسێدارەدانی بۆ دەرچووە، كاری سیخوڕی كردووە و لەگەڵ خێزانەكەیدا لەسوریادا نیشتەجێ بووە و زانیاری لەسەر ڕاوێژەكارە ئێرانییەكان و كارەكانی وەزارەتی بەرگری و فەیلەقی قودس و جموجۆڵەكانی قاسمی سولەیمانی و شوینی مانەوەی لەساڵانی 2018 و 2019 داوەتە ئیسرائیل و ئەمریكا.

 

ئاماژەی بۆ ئەوەشكردووە، ئەو سیخوڕە پەیوەندی رووداوى كوشتنی قاسمی سولەیمانیەوە نەبووە و ئەو زانیاری لەسەر هێزە ڕاوێژەكارەكانیان لەسوریا داوەتە نەیارەكانیان.

 

ئیسماعیلی باسی لەوەشكردووە، سزای لەسێدارەدان لەدژی موسەوی دەرچووە و گشتێنراوە و لەئایندەیەكی نزیكدا جێ بەجێ دەكرێت.

 

ئەوە لەکاتێکدایە پێشتر وتەبێژی دەسەڵاتی دادوەری ئێران، ئاماژەی بەوەکردبوو، مەحمود موسوی مەجد  دەستی هەبووە لەئاشکراکردنی شوێنی قاسم سلێمانی و زانیارییەکانی دەربارەی جوڵەکانی ئەو فەرماندەیەی داوە بەو دوو دزەگا هەواڵگرییە.  

 

بەڵام هەر ئەوکات مەهدى كشت دار، بەڕێوەبەرى ئاژانسى "ميزان" ئاشكرایکردبوو، كاتێك سولەيمانى كوژراوە "مەجد" لە زينداندا بووە و ئەو نەبووە كە زانيارى لەسەر چوونی قاسمى بۆ فڕۆكەخانەى بەغدا ئاشكرا كردووە.  

  

 قاسم سلێمانی، فەرماندەی فەیلەقی قودسی سوپای پاسدارانی ئێران، لە3 ی کانوونی دووەمی ئەمساڵدا لە هێرشێکی فڕۆکە بێفڕۆکەوانەکانی ئەمریکا لەگەڵ ئەبومەهدی موهەندیس، جێگری سەرۆکی دەستەی حەشدی شەعبی لە نزیک فڕۆکەخانەی نێودەوڵەتی شاری بەغدا کرانە ئامانج و کوژران.