گه‌ڕان

Shadow Shadow
سیاسه‌تی

گونجاوترینیان هەڵوەشاندنەوەى هاوپەیمانى فەتحە

ڕۆژنامەی حزبوڵا چەند گریمانەیەک بۆ دەستلەکارکێشانەوەی عامری دەخاتە ڕوو

2020.06.08 - 17:54
ڕۆژنامەی حزبوڵا چەند گریمانەیەک بۆ دەستلەکارکێشانەوەی عامری دەخاتە ڕوو

ناس کورد-

دەستلەکارکێشانەوەی هادی عامری لە سەرۆکایەتی هاوپەیمانێتی فەتح وئەندامێتی پەرلەمانی عێراق پێدەچێت پێشەکییەک بێت بۆ سەرهەڵدانی کۆمەڵێک پێشهات کە لە گرنگترنیان لەیەکترازان و هەڵوەشاندنەوەی هاوپەیمانێتییەکە بێت، ئەوەش بەپێی راپۆرتێکى رۆژنامەى ئەخبارى سەر بە حزبوڵاى لوبنان.

 

بەگوێرەی ڕاپۆرتێکی ڕۆژنامەکە، دەستەلەکارکێشانەوەى هادی عامری، سەرۆکی هاوپەیمانی فەتح لە ڕابەرایەتیکردنی هاوپەیمانییەکە و لەدوایشدا دەستلەکارکێشانەوەی لە ئەندامێتی پەرلەمانی عێراق پێشبینی ئەوەی لێی دەکرێت گەلێک پێشهاتی بەدواوە بێت کە لەگرنگترینیان لەیەکترازان و هەڵوەشاندنەوەی هاوپەیمانێتی فەتح بێت.

 

ئاماژە بەوەشکراوە، "دانانی عەبدولکەریم یونس عێلان، سەرکردە لە ڕێکخراوی بەدر لە شوێنی عامری لە پەرلەمانی عێراق لەلایەن خودی عامری خۆیەوە پێشێلکردنێکی یاسایی ڕوونە، چونکە ئەو کارە لە دەسەڵاتی عامریدا نییە، بەڵکو یەکێکە لە دەسەڵاتەکانی کۆمسیۆنی باڵای هەڵبژاردنەکانی عێراق".

 

ڕاپۆرتەکە ئەوەشی خستوەتەڕوو، "ئەگەری هەیە دەستلەکارکێشانەوەکەی عامری لەسەرۆکایەتی هاوپەیمانێتی فەتح بەهۆی ئەو سکاڵاو گلەییە زۆرانەوە بێت کە پێشتر سەرکردەکانی هاوپەیمانێتییەکە کردویانە لە ئەدای عامری کە زۆرجاریش ئەو گازندانەیان گەیاندوەتە لایەنە هەرێماتییەکان".  

 

ڕۆژنامە لوبنانییەکە باسی لەوەشکردووە، "پێدەچێت لە پشت دەستلەکارکێشانەوەی عامرییەوە چەند گریمانەیەکی تریش هەبێت وەک خۆئامادەکردنی ناوبراو بۆ وەرگرتنی پۆستی سەرۆکایەتی دەستەی حەشدی شەعبی کە هەرچەندە ئەو دەنگۆیە چەند جارێکیش لەلایەن  سەرکردەکانی ئەو دەستەوە ڕەتکراوەتەوە".

 

هەروەها ئاماژەی بە گریمانەیەکی تریش کردووە، "ئەگەری هەیە هەنگاوەکەی عامری بەشێک بێت لەڕێکاری ڕێکخستنەوەی ناوی ماڵی ڕێکخراوی بەدر و هەوڵدانی عامری بۆ ئەوەی ببێت بە یەکێک لە سەرکردە باڵاکانی ناو ماڵی شیعە دور لە هەموو پلەیەکی پەرلەمانی".

 

بەپێی رۆژنامەکە، لەگەڵ بوونی ئەو هەموو پێشبینیانە بۆ دەستلەکارکێشانەوەکەی عامری پێدەچێت گریمانەی هەڵوەشاندنەوەی هاوپەیمانێتی فەتح لەدوای ناکۆکی ومشتومڕی سەرکردەکانی ناو هاوپەیمانییەتییەکە بە تایبەتی لە پرسی کاندیدکردنی مستەفاکازمی، بۆ سەرۆکایەتی حکومەتی عێراق لەهەموو گریمانەکانی تر گونجاوتر و ڕاست تربێت.