گه‌ڕان

Shadow Shadow
سیاسه‌تی

ليژنەى باڵاى تەندروستى و سەلامەتى قەدەغەى هاتوچۆى بۆ هەفتەيەك درێژ كردەوە

2020.06.06 - 22:17
App store icon Play store icon Play store icon
ليژنەى باڵاى تەندروستى و سەلامەتى قەدەغەى هاتوچۆى بۆ هەفتەيەك درێژ كردەوە

ناس کورد-

 

ليژنەى باڵاى تەندروستى و سەلامەتى نيشتمانیى عێراق كە مستەفا كازمى، سەرۆك وەزيران سەرۆكايەتى دەكات، قەدەغەى هاتوچۆى بۆ ماوەى هەفتەيەكى تر درێژ كردەوە كە لە سبەينێ يەكشەممە دەست پێدەكات و ڕێوشوێنەكانيش توندتر دەكرێنەوە.

کەناڵی ناس کورد لە تێلیگرام جۆین بکە   

 

ليژنەكە چەند بڕيارێكى نوێى دەركردوە لەوانەش، ڕێگەگرتن لە كۆبونەوە بە هەموو شێوەكانيەوە، بەردەوامى داخستنى ڕێستۆرانت و خواردنگەكان و تەنها ئەوانە نەبێت كە گەياندن "ديليڤەرى" يان هەيە، هەروەها هۆڵەكانى بۆنەكان، پاركەكان، كافترياكان، سينەما و مۆڵەكان و هۆڵەكانى وەرزش و پەيمانگا تايبەتيەكان، نۆرينگە تايبەتيەكان، مەلەوانگە، شوێنى كار جگە لەوانەى كە مەوادى خۆراكى و ميوە و سەوزەوات دەفرۆشن، هەروەها نانەواخانە و سەمونخانە و دەرمانفرۆشەكانيش داناخرێن.

 

هەر لە بڕيارەكانى ليژنەكە هاتوە، هاوڵاتيان پابەند دەكرێن لە شوێنە گشتيەكان كەمامە بپۆشن و بەپێچەوانەوە سزاى سەرپێچيكاران دەدرێت، پێويستە لەڕوويى جەستەييەوە لەيەك دوركەونەوە لانيكەم دوو مەتر، هەروەها هاتوچۆى نێوان پارێزگاكان قەدەغەيە و پێويستە بە تەواوەتيش پابەندى رێنماييەكانى ليژنەكە بن تايبەت بە ئاسانكارى بۆ ئەو خێزانانەى كە لەنێوان پارێزگاكاندا گيريان خواردوە.

 

هەر بەپێى بڕيارەكان، هاتوچۆى ئۆتۆمبێل لەناو پارێزگاكاندا قەدەغەيە جگە لە كارمەندانى دەزگا ئەمنيەكان و لايەنە ئەمنيەكان و بەڕێوەبەرايەتيە خزمەتگوزاريەكان.

 

تەئكيديش كراوەتەوە، پێويستە دامەزراوە حكوميەكان و ناحكوميەكان و نەخۆشخانە ئەهليەكان مەوادى پاكژكەرەوە و كەمامە بۆ كارمەندەكانيان دابين بكەن، سەرەڕاى ئەوەش ئەو شوێنانەى كە ڕێگەيان پێدراوە بكرێنەوە ئەگەر ڕێنماييەكان جێبەجێ نەكەن ئەوا سزا و سزاى داراييش لەسەريان قورستر دەكرێت.

 

ليژنەى باڵاى تەندروستى و سەلامەتى نيشتمانى بڕيارى ئەوەشى داوە، ئەو پارێزگايانەى كە مەزارگەى ئايينيان تێدايە بە تەواوەتى دادەخرێن و ئاليەتێك بۆ ناشتنى مردوان دادەنرێت، رێوشوێن لەو پارێزگايانەش توندتر دەكرێتەوە كە خاڵكى سنوريان هەيە لەگەڵ دەوڵەتانى دراوسێ وەك "سلێمانى، ديالە، واست و ميسان".