گه‌ڕان

Shadow Shadow
چیرۆكه‌كانمان

زانیاری نوێ‌ لە بارەی دۆسیەكە

ئەو هاووڵاتییەى لە سلێمانى کوژرا تۆمەتبارە بەكوشتنی چەند كەسێك

2019.04.13 - 17:50
App store icon Play store icon Play store icon
ئەو هاووڵاتییەى لە سلێمانى کوژرا تۆمەتبارە بەكوشتنی چەند كەسێك

کەناڵی ناس کورد لە تێلیگرام جۆین بکە   

ناس كورد- شەهرام عەزیز


لەرووداوێكی تەموژاویدا كە هێشتا سەرەداوەكەی لەلایەن هێزە ئەمنییەكانی سلێمانییەوە ئاشكرا نەكراوە، دوێنێ‌ (هەینی) هاووڵاتییەك بەناوی عومەر رەزا ناسراو بە (مەلا عومەر) لەگەڕەكی مامە یارە، كوژرا.
ناس كورد بەدواداچوونی بۆ دۆسیەكە كردووە و دەركەوتووە ناوبراو سێ‌ دۆسیەی كوشتنی لەدادگا هەبووە و یەكێك لەدۆسیەكان كوشتنی كچەكەی خۆی بوو بەناوی (سنور).

سنور عومەر رەزا، كچێكی تەمەن 21 ساڵ بوو، رۆژی 2ی10ی 2015 لە نێو پاركی دایك لە شاری سلێمانی لەلایەن باوكیەوە كوژرا و رۆژی (26/10) و دوای بیست و چوار رۆژ لەكوژرانی لەلایەن شارەوانی سلێمانیەوە و بەئامادەبوونی چالاكوانانی ژنان و رێكخراوەكان و بێ ئامادەبوونی كەس و كارەكەی ئەسپەردەی خاك كرا.

[caption id="attachment_67600" align="aligncenter" width="600"] وێنە: (سنور عومەر رەزا) بە کوژراوی لە پارکی دایک لە سلێمانی[/caption]

 

 

 

 

 

 

 

 

 

 

 

.

ناس كورد لەبەدواداچوونەكانی بۆ ئەو دۆسیەیە بۆی دەركەوتووە، ئەو عومەر رەزا (مەلا عومەر) دۆسیەی كوشتنی سێ كەسی لەسەر بووە لەدادگای سلێمانی، ئەوانیش: دۆسیەی كوشتنی كچەكەی، دۆسیەی كوشتنی خەسو و خەزووری كچەكەی.

عومەر ئەحمەد، وتەبێژی دادگای لێكۆڵینەوەی سلێمانی تایبەت بە ناس كورد-ی ڕاگەیاند"مەلا عومەر لە ڕابردوودا دۆسیەیەكی كوشتنی هەبووە لە بنكەی پۆلیسی سەرا كە دوای لیكۆڵینەوە و گشتاندنی دۆسیەكە، تاوانەكەی بەسەردا سەپێندراوە و دەركەوتووە كە خەزوری كچەكەی كوشتووە".

وتەبێژی دادگای سلێمانی ئاماژە بەوە دەكات، هەر لە بنكەی پۆلیسی سەرا دۆسیەیەكی دیكەی هەبووە كە ئەویش هەوڵدان بووە بۆ كوشتنی دوو كەس و هەردووكیانی بریندار كردووە.

.

بەپێی زانیارییەكانی ناس كورد، ئەو دوو كەسەش هاوسەر و كوڕێكی كوژراوی یەكەم بوون، واتە دایك و برای زاوایەكی مەلا عومەر بوون و پاش ماوەیەك ژنەكەش گیانی لەدەستداوە و كوڕەكەشی بەهۆی ڕووداوەكەوە ئێستا كەمئەندامە و لەجێگەدا كەوتووە.

لەبارەی دۆسیەی كوشتنی مەلا عومەر هەتا ئێستا كە زیاتر لە 24 كاتژمێر بەسەر روداوەكەدا تێپەڕیوە، بەڕێوەبەرایەتی پۆلیسی سلێمانی و دەزگا ئەمنییەكانی شاری سلێمانی هیچ روونكردنەوەیەكیان لەبارەی دۆسیەكە نییە.

.
دوێنێ‌ (هەینی) سەرچاوەیەكی ئاگادار لە پۆلیسی سلێمانی تایبەت بە ناس كورد-ی وت"ئەو كەسەی لە گەڕەكی مامەیارەی شاری سلێمانی كوژرا ناوی (مەلا عومەر)ە و بە دەستڕێژی گولە كوژراوە و كەسێكیش كە پاسەوانی بووە بریندار بووە".
بەپێی وتەی سەرچاوەكەی ناس كورد، ئەو كەسە لەكاتی دابەزین لە ئۆتۆمبێلەكەیدا، ئۆتۆمبێلێكی دیكە بە بەردەمیدا ڕۆیشتووە و دەستڕێژی گولـەی لێكردووە و دەستبەجێ گیانی لەدەستداوە و پاسەوانەكەشی برینداربووە و برینەكەی مەترسیدار نییە.

.
وتەبێژی دادگای سلێمانی زانیاری نوێ‌ لەبارەی مەلا عومەر بۆ ناس كورد، ئاشكرا دەكات و ئاماژە بەوە دەكات كە هەفتەی رابردوو دوو جاری دیكە هەوڵی كوشتنی دراوە و رزگاری بووە و چەندین جار هێزەكانی پۆلیس هەوڵی دەستگیركردنی ئەو كەسەیان داوە، بەڵام كاتێك كە چوون بۆ دەستگیركردنی ئەو لەو جێگەیە نەماوە و نەتوانراوە دەستگیر بكرێت.

.

لە ئێستادا و لە دوای كوژرانی مەلا عومەر سەرجەم ئەو دۆسیانەی كە لەسەری بوون داخراوون، وتەبێژی دادگای لیكۆڵینەوەی سلێمانی لەبارەی داخستنی ئەو دۆسیایانە بۆ ناس كورد-ی روونكردەوە"بەپێی ماددەی (304) لە یاسای بنەمای دادگەرییە سزاییەكان، هەر تۆمەتبار یاخود تاوانبارێك لە دوای مردنی سەرجەم دۆسیەكانی دادەخرێن".