گه‌ڕان

Shadow Shadow
سیاسه‌تی

نەتەوە یەکگرتووەکان بەڵگەى دەستکەوتووە

خاوەنی ئەو ژمارە مۆبایلانە دۆزرانەوە کە چەکدارانی داعش بەکاریانهێنابوو

2020.05.13 - 10:17
App store icon Play store icon Play store icon
خاوەنی ئەو ژمارە مۆبایلانە دۆزرانەوە کە چەکدارانی داعش بەکاریانهێنابوو

ناس کورد-

لیژنەیەكی تایبەتمەندی سەر بەنەتەوە یەكگرتووەكان لە میانی لێكۆڵینەوەكانیانیدا لەسەر تاوانەكانی داعش، چەندین بەڵگەی نوێیان بەدەستخستووە كە زۆربەیان لەڕێگەی ژمارە مۆبایل و زانیارییە كەسییەكانی سیمكارتی ژمارەیەك بەكارهێنەرەوە بەدەستهاتوون كە داعش بەكاریهێناون.

کەناڵی ناس کورد لە تێلیگرام جۆین بکە   

 

لە ڕاپۆرتی ساڵانەیدا كە لیژنەكە پێشكەشی ئەنجومەنی ئاسایشی كردووە و میدیا فەڕەنسیەكان كۆپیەكیان دەستكەوتووە، سەرۆكی لیژنەكە ئاماژەی بەوە كردووە، بەهاوكاری بەرپرسانی عێراقی توانیویانە چەند تۆمارێكی دەنگی پەیوەندییەكانیان لەلایەن كۆمپانیا عێراقیەكانەوە دەستبكەوێت كە بە مۆبایل ئەنجامدراون.

 

سەرۆكی لیژنەكە ئەوەشی ڕوونكردووەتەوە، هاریكارییەكە دەرفەتی ڕەخساندووە بۆ كۆكردنەوەی داتا و زانیارییەكان لەسەر ژمارەیەك مۆبایل و سیمكارت و شوناسی بەشداربوانیان و زانیارییە كەسییەكانیان كە لەلایەن داعشەوە بەكارهێنراون.

ئەو زانیاری و داتایانەش یارمەتیدەرن بۆ پەلەكردن لە لێكۆڵینەوە یاساییەكاندا بەمەبەستی دۆزینەوەی ئەندامانی داعش كە گومان دەكرێت تاوانی جیاجیایان لەدژی چەندین پێكهاتە لەسەرتاسەری عێراقدا ئەنجامدابێت.

 

سەرۆكی لیژنەكە لە ڕاپۆرتەكەیدا ئاماژەی بۆ هێرشەكەی مانگی ساڵی 2014 سەر شەنگال لەدژی ئیزدیەكان كردووە و جەختی لەسەر ئەوەش كردووەتەوە، زیاتر لە دوو ملیۆن پەیوەندییان بەدەستخستووە كە زانیاری لەسەر شوێنی جوگرافی كەسە بەكارهێنەرەكان ئاشكرا دەكات.

 

هەر لەڕاپۆرتەكەدا كە 21 پەڕەیە باس لەوەش كراوە، زانیاری و داتا لەسەر كوشتنی دوو سەربازی عێراقی لە تكریت لە مانگی حوزەیرانی ساڵی 2014 بەدەستخراوە.

 

سەرۆكی لیژنەكە ئاماژەی بۆ ئەوەش كردووە، بەهۆی كۆمەك و پاڵپشتیە داراییەكانی هەر یەكە لە بەریتانیا و ئیرلەندای باكور و ئەمریكاوە لێكۆڵەڕە جیهانییەكان دەتوانن چەندین تاوانی تری داعش كە لەدژی شیعە و مەسیحیی و یارسانەكان و شەبەك و سوننە و توركمان ئەنجامیداوە ئاشكرا بكەن.

 

ئەو لیژنەیەی كە ساڵی 2017 ئەنجومەنی ئاسایش دایمەزراند، لەسەرتاسەری جیهاندا 129 ئەندامی هەیە و لە 49% ئەندامەكانیان ئافرەتن.



نەتەوە یەكگرتووەكان كۆمەڵكوژییەكەی داعش لەدژی ئێزدییەكانی عێراق بە جینۆساید دەزانێت.

 

بەپێی زانیاری نەتەوە یەكگرتووەكان، دوای ئەوەی لەكۆتای ساڵی 2017 كە داعش لەڕووی بەرەییەوە تێكشكا، زیاتر لە200 گۆڕستانی بەكۆمەڵ كە 12 هەزار تەرمی تیادا بووە دۆزراونەتەوە.