گه‌ڕان

Shadow Shadow
سیاسه‌تی

تەندروستی عێراق هۆشداری دەدات لە پەرەسەندی کۆرۆنا و سەپاندنەوەى قەدەغەى تەواوەتى هاتوچۆ

2020.05.11 - 20:20
App store icon Play store icon Play store icon
تەندروستی عێراق هۆشداری دەدات لە پەرەسەندی کۆرۆنا و سەپاندنەوەى قەدەغەى تەواوەتى هاتوچۆ

ناس کورد –

وەزیری تەندروستی عێراق هۆشداری دا لە تەشەنەسەندنی ڤایرۆسی کۆرۆنا و بڵاوبوونەوەی پەتاکە بۆ ناوچەکانی دیکەی وڵات، جەختیشیکردەوە بەهۆی پابەندنەبوونی هاووڵاتیان بە ڕێکارەکانەوە ناچاردەبن جارێکی دیکە قەدەغەی گشتی لەوڵاتدا بسەپێننەوە.

کەناڵی ناس کورد لە تێلیگرام جۆین بکە   

 

وەزارەتى تەندروستى عێراق لەبەیانامەیەکدا ڕایگەیاند، ئەمڕۆ 51 توشبوى دیکەى کۆرۆنا تۆمارکراوە، کە 50 حاڵەتیان لەبەغدا بوون، حاڵەتەکەى دیکەش لە بەسرە تۆمارکراوە، هەروەها 56 حاڵەتى چاکبوونەوە تۆمارکراوە، توشبوویەکیش گیانى لەدەستداوە.

 

بە تۆمارکردنى ئەو توشبووە نوێیانە، ئامارى توشبووانى کۆرۆنا لە عێراق بۆ 2818 حاڵەت بەرزبووەوە کە 110 کەسیان مردوون و 1710 کەسیان چاکبوونەتەوە.

 

لاى خۆیەوە، حەسەن تەمیمی، وەزیری تەندروستی عێراق ئەمڕۆ دووشەممە، 11ى ئایاری2020، لە ڕاگەیاندراوێکدا وتی، "هوشداری دەدەین لە بەرزبوونەوەی ڕێژەی توشبوون بە ڤایرۆسی کۆرۆنا لە هەندێ ناوچەی عێراقدا کە ئەگەری هەیە ئەو شوێنانە ببن بە مۆڵگەى بڵاوبوونەوەی ڤایرۆسەکە و لە دوایشدا لەو شوێنانەوە تەشەنە بکات بۆ چەندین ناوچەی دیکەی عێراق".

 

تەمیمی پابەندنەبوونی هاووڵاتیان بە ڕێکارەکانی بەرگرتن لە ڤایرۆسی کۆرۆنا بە هۆکاری سەرەکی وەسفکرد لە هەڵکشانی ژمارەی توشبووانی پەتاکە لە عێراقدا.     

 

وەزیری تەندروستی عێراق بە توندی ڕەخنەی لە بێباکی هاوڵاتیانی عێراق گرت لە جێبەجێنەکردنی ڕێکارەکانی خۆپارێزی لە پەتاکە و وتی "گوێنەدان بە دابینکردنی کەلوپەلەکانی تایبەت بە خۆپارێزی لە ڤایرۆسی کۆرۆنا و نەپۆشینی دەمامک لە شوێنی کارکردندا و سەرداننەکردنی نەخۆشخانەکان لە کاتی دەرکەوتنی نیشانەکانی پەتاکە  بوونەتە هۆکاری هەڵکشانی ژمارەی توشبووانی ڤایرۆسەکە لە عێراقدا".  

 

هاوکات وەزیری تەندروستی عێراق هوشداریدا لە مەترسی ئەو دۆخە تەندروستییەی کە ئێستا عێراق پییدا گوزەر دەکات "لەگەڵ بەرزبوونەوەی زیاتری توشبووان بە ڤایرۆسی کۆرۆنا ناچار دەبین دووبارە سەپاندنی قەدەغەی گشتی لە هەموو عێراق یاخود لەو شوێنانەی کە ڤایرۆسەکەی تێیدا بڵاوبووەتەوە پەیڕەوبکەینەوە ".