گه‌ڕان

Shadow Shadow
سیاسه‌تی

وەزیری شارەوانی: سەرقاڵی پڕۆژەیەکین گرفتی کەمئاوی هەولێر چارەسەر دەکات

2020.05.11 - 13:20
App store icon Play store icon Play store icon
وەزیری شارەوانی: سەرقاڵی پڕۆژەیەکین گرفتی کەمئاوی هەولێر چارەسەر دەکات

ناس کورد-

وەزیری شارەوانی و گەشتوگوزار لەبارەی گرفتی ئاو و خزمەتگوزارییەكان لە گەڕەکی 8ی حەسارۆك لە شاری هەولێر ڕونکردنەوەیەکی بڵاوکردەوە و ئاماژەی بەوەکرد، هێڵی ئیفرازی تازەی بۆ دەردەچێت، دەشڵێت، بە جێبەجێکردنی ئەو پڕۆژەیە گرفتی کەمئاوی لە شاری هەولێر نامێنێت.

 

کەناڵی ناس کورد لە تێلیگرام جۆین بکە   

 

ئەمڕۆ (دووشەممە، 11 ئایاری 2020)، لە ڕاگەیەندراوێکدا ساسان عەونی، وەزیری شارەوانی و گەشتوگوزاری هەرێم ڕایگەیاند: "حكومەت دەتوانێت خزمەتگوزاری بۆ ئەو گەڕەكە ببات، پڕۆژەی هێڵی تازەی ئیفرازی ئەو گەڕەكە كەوتووەتە بواری جێبەجێكردن و بەشێكیشی تەواو بووە، گرفتی سەرەكی ئەو گەڕەكە نەبوونی ئاوە كە لە رێی بیرەوە ناتوانرێت ئاو بۆ هاووڵاتیانی شوێنەكە دابین بكرێت".

 

ئاماژەی بەوەشكرد :" گرفتی سەرەكی لەو گەڕەكە نەبوونی ئاوە و هەر جۆرە خزمەتگوزارییەكی دیكە ببەیتە ئەو شوێنە، ناكرێ دانیشتووان خانووی لێ دروست بكەن، ئەگەر خزمەتگوزاری ئاوی تێدا نەبێت".

 

وەزیری شارەوانی و گەشتوگوزار ئەوەشی خستووتەڕوو: "گەڕەكی 8ی حەسارۆك هەزاران پارچە زەوییە و شوێنێكی بەرزیشە، لێدانی بیری ئاو چارەسەری گرفتی ئاوی ئەو شوێنە ناكات كە قووڵایی بیرەكانمان لە هەندێ شوێن بووەتە زیاتر لە 450 مەتر و ئەو شوێنەش چەندان بیری دەوێت و ناشكرێ لە پڕۆژەكانی دیكەی ئاو راستەوخۆ بۆی ببرێت".

 

ڕوونیشیکردەوە: "چارەسەركردنە ریشەییەكەی بە جێبەجێكردنی هێڵی تازەی ئیفراز دەبێت كە ئێستا لە بەرنامەدایە و بەشێكیشی كەوتووەتە بواری جێبەجێكردنەوە، بە تەواوبوونی ئەو پڕۆژەیەی هێڵی تازەی ئیفرازیش گرفتی ئاو لە 8ی حەسارۆك بە شێوەیەكی تایبەت و بە گشتیش گرفتی كەمئاوی لە شاری هەولێر نامێنێت".

 

ساسان عەونی ئاماژەی بەوەكردووە :"پێشتریش بڕیاری ئەوە هەبووە خزمەتگوزارییەكانی حكومەت بگاتە هەموو شوێنێك و گەڕەکى هەشتى حەسارۆكیش دەكەوێتە ناو جەرگەی شاری هەولێر و لۆژیكی نییە كە حكومەت پلانی بۆ گەیاندنی خزمەتگوزاری بۆ ئەو شوێنە نەبێت، بەڵام گرنگترین بەشی خزمەتگوزاری دابینكردنی ئاوی خواردنەوەیە، چونكە خەڵكی رەنگە بتوانن بەبێ كارەبا و هەندێ خزمەتگوزاری دیكە بژین، بەڵام بەبێ ئاو نە لە هاوین نە لە زستاندا ناتوانن بژین".

 

وەزیری شارەوانی و گەشتوگوزاری حكومەتی هەرێمی كوردستان جەختى كردووەتەوە كە ئەو گرفتە لە رێی هێڵی تازەی ئیفراز چارەسەر دەكرێت و بە تەواوبوونی ئەو هێڵە ئاو بۆ هەشتی حەسارۆك دابین دەكرێت و گرفتی كەمئاویش لە شاری هەولێر نامێنێت.