گه‌ڕان

Shadow Shadow
سیاسه‌تی

بەهۆى ڕێوشوێنەكانى كۆرۆناوە مليۆنان كەس توشى سيل دەبن

كۆرۆنا نەخۆشى سيلى لەبير جيهان بردوەتەوە.. هۆشدارى دەدرێت

2020.05.07 - 10:08
App store icon Play store icon Play store icon
كۆرۆنا نەخۆشى سيلى لەبير جيهان بردوەتەوە.. هۆشدارى دەدرێت

ناس کورد- 

لێكۆڵينەوەيەكى نوێ دەریخست، بەهۆى ڕێوشوێنەكانى دژى ڤايرۆسى كۆرۆنا و داخستنى جيهانى، لەماوەى چەند ساڵى داهاتودا مليۆنان كەس توشى نەخۆشى سيل دەبن.

 

کەناڵی ناس کورد لە تێلیگرام جۆین بکە   

بەگوێرەى لێكۆڵينەوەكە كە ئەنجومەنى "هاوبەشى لەناوبردنى سيل" بڵاويكردوەتەوە، پێشبينى ئەوە دەكرێت كە 6 مليۆن و 300 هەزار كەس توشى نەخۆشى سيل ببن تا ساڵى 2025، ئەوەش بەهۆى ئەوەى لەئێستادا بەهۆى ڕێوشوێنەكانى دژى ڤايرۆسى كۆرۆنا تواناى ئەوە نييە توشبوانى ئێستا چارەسەر بكرێن و توشبوانى نوێش دەستنيشان بكرێن.

 

لە ئەنجامدانى لێكۆڵينەوەكەدا زانكۆى هۆبكينز و ئاژانسى گەشەپێدانى نێودەوڵەتى ئەمريكى و زانكۆى ئيمپرياڵ كۆلێج لەندەن و كۆمپانياى ئۆفێندەر هێڵز بەشداريان كردوە و ئەوەشيان ڕونكردوەتەوە، هەر لە هەمان ماوەدا يەك مليۆن و 400 هەزار كەسى تر بە سيل گيان لەدەست دەدەن.

 

بەهۆى بڵاوبونەوەى ڤايرۆسى كۆرۆنا بە جيهاندا ژمارەيەكى زۆر وڵاتى جيهان ڕێوشوێنى توند و كەرەنتين و بڕيارى مانەوە لە ماڵ و داخستنى شوێنە گشتيەكان و چەندين بڕيارى تريان داوە بۆ ڕێگەگرتن لە بڵاوبونەوەى ڤايرۆسەكە و مليارەها خەڵك لە ماڵەكانياندا ماونەتەوە.

 

لێكۆڵينەوەكە ئەوەشى ڕونكردوەتەوە، هەوڵە جيهانيەكان بۆ بەرەنگاربونەوەى نەخۆشى سيل ماوەى 5 ساڵ پاشەكشە دەكات بەلانى كەمەوە لەوانەيە بگاتە 8 ساڵ ئەوەش بەهۆى ئەو كۆت و بەندانەى سەپێنراون.

 

لاى خۆيەوە "لۆسيكا ديتيو" بەڕێوەبەرى جێبەجێكارى ئەنجومەنى "هاوبەشى لەناوبردنى سيل" دەڵێت، پێويستە ئەوەمان لە بير بێت كە سيل و نەخۆشيەكانى تريش بەردەوام دەبن لە دانانى كاريگەرى لەسەر مرۆڤ و هەموو ڕۆژێك مرۆڤ بەو نەخۆشيانە گيان لەدەست دەدەن و تەنها پەتاى كۆرۆنا بونى نييە.

 

لێكۆڵينەوەكە پشتى بەو سێ مانگە بەستوە كە زۆربەى جيهان لە كەرەنتيندان و ماوەى گەڕانەوەى چالاكى ئاسايى ڕۆژانەش 10 مانگ دەخايەنێت، هەروەها داتاكان لە سێ وڵاتدا كۆكراونەتەوە كە ڕێژەيەكى زۆر توشبويان بە نەخۆشى سيل تێدا تۆمار دەكرێت ئەوانيش هندستان، كينيا و ئۆكرانيان و دواتريش كراون بە پێوانە بۆ سەرجەم ناوچەكانى جيهان.

 

"لۆسيكا ديتيو" هۆشداريش دەدات لەوەى، نەخۆشى سيل دەگوازرێتەوە ئەويش لەڕێگەى هەواوە، بۆيە هەر توشبويەك كە نادۆزرێتەوە و چارەسەر ناكرێت چەندين كەسى تريش توش دەكات.

 

وێستگەى هەواڵيى CNBC ئەمريكى ئەوەى بڵاوكردوەتەوە، بەهۆى كۆتوبەندەكان ئەستەمە هاوكارى بگەيەنرێتە ناوچە زۆر لاوازەكانى جيهان و توشبوانى سيل ديارى بكرێت و چارەسەر بكرێن.

 

ڕێكخراوى تەندروستى جيهانى جەختدەكاتەوە، سيل يەكەم نەخۆشى كوشندەى گواستراوەيە لە جيهاندا و ساڵانە 10 مليۆن كەس توش دەبن و نزيكەى مليۆنێك و 500 هەزار كەسيش بەو نەخۆشيە گيان لەدەست دەدەن.