گه‌ڕان

Shadow Shadow
سیاسه‌تی

ناوی کاندیدانی کابینەکەی کازمی گەیشتە پەرلەمان.. یەک هەنگاوی ماوە

2020.05.05 - 23:14
App store icon Play store icon Play store icon
ناوی کاندیدانی کابینەکەی کازمی گەیشتە پەرلەمان.. یەک هەنگاوی ماوە

ناس کورد-

ڕاوێژکارێکی سەرۆکی پەرلەمانی عێراق ڕایگەیاند، لیستی ناوی کاندیدانی کابینەکەی مستەفا کازمی گەیشتووەتە پەرلەمان و پێش دانیشتنەکەی سبەینێ دەدرێتە پەرلەمانتاران.

کەناڵی ناس کورد لە تێلیگرام جۆین بکە   

 

بورهانەدین ئیسحاق، ڕاوێژکاری محەمەد حەلبوسی، سەرۆکی پەرلەمانی عێراق بە میدیا عێراقییەکانی ڕایگەیاند: "ئێستا لیستی ناوی کاندیدەکانی کازمی بۆ وەزارەتەکان لە پەرلەمانی عێراقە".

 

ئاماژەی بەوەشکردووە: "لیستی ناوەکان بە وردەکاریی و ژیاننامەی کاندیدەکانەوە دەدرێتە ئەندامانی پەرلەمان بۆ ئەوەی پێش دانیشتنەکەی سبەینێ بیبنین و لەبەردەستیاندا بێت بۆ متمانەدان بە کابینەکە و دەنگدان بە کاندیدەکان".

 

بڕیارە سبەینێ چوارشەممە کاتژمێر 9:00ی شەو دانیشتنی پەرلەمان بۆ متمانەدان بە حکوومەتەکەی کازمی ئەنجام بدرێت و بۆ وەرگرتنی متمانە کازمی پێویستی بە دەنگی (50+1)ی پەرلەمانتارانی ئامادەبووە.

 

تاوەکو ئێستا هەریەک لە دەوڵەتی یاسای مالیکی و هاوپەیمانی نیشتیمانیی ئەیاد عەلاوی بە فەرمی ڕایانگەیاندووە دەنگ بە کابینەکەی کازمی نادەن و فراکسیۆنە کوردییەکانیش تاڕەدەیەک پشتگیرییان بۆ ناوبراو دووپاتکردووەتەوە بەڵام بە مەرج.

 

پەرلەمانتارێکی کورد لە بەغدا ئەو خاڵانە ئاشکرا دەکات کە فراکسیۆنە کوردییەکان کردوویانە بە مەرج بۆ دەنگدان یان ڕەتکردنەوەى کابینەکەى مستەفا کازمی و دەڵێت، لەگەڵ پارتی و یەکێتییش ڕێککەوتووین لەسەریان.  

 

بەهار مەحمود، پەرلەمانتاری گۆڕان لە پەرلەمانی عێراق دەڵێت، دوێنێ نوێنەری فراکسیۆنى گۆڕان و یەکگرتوو سەربەخۆ لەگەڵ مستەفا کازمی، ڕاسپێردراو بۆ پێکهێنانی حکومەتى عێراق کۆبوونەتەوە.  

 

بەهار مەحمود دەشڵێت، "چەند خاڵێکمان دا بە کازمی وەک مەرجی ئێمە بۆ دەنگدان بە کابینەکەى."  

 

خاڵەکان بریتین لە:  

1-  تێکەڵنەکردنی موچەى فەرمانبەرانی هەرێم بە ململانێی سیاسیی لەگەڵ حکومەتى هەرێم و بەرپرسە حزبییەکان.  

 

2- شایستە داراییەکان پێشمەرگە و جوتیاران.  

 

3- پابەندبوون بە دەستور و پێکهێنانی لیژنەى بۆ مادەى 140.  

 

4- تەواوکردنی ڕێکارەکان بەپارێزگابوونی هەڵەبجە.  

 

بەهار مەحمود دەشڵێت، هەر ئەمڕۆ سێشەممە، "باسی ئەم هەڵوێستەمان لەگەڵ سەرۆکی فراکسیۆنەکانی پارتی و یەکێتی کرد و داوامان کرد بیکەینە داواکاری و مەرجی هەموومان بۆ دەنگدان بە کابینەکەی، بە خۆشحاڵیەوە ئەوانیش هاوڕا بوون."  

 

دەشڵێت، "هەموو فراکسیۆنە کوردیەکان لەگەڵ شاندەکەى حکومەتی هەرێم دەچینە لای سەرۆککۆمار بەمەبەستی یەکخستنی هەڵوێستمان لەسەر دانیشتنی سبەینێی پەرلەمان بۆ دەنگدان بە کابینەکەى کازمی.