گه‌ڕان

Shadow Shadow
سیاسه‌تی

هەماهەنگی چارەسەرە

هەڵوێستی وەزارەتی پێشمەرگە لەسەر زیادبوونی هێرشەکانی داعش لە عێراق

2020.05.04 - 21:15
App store icon Play store icon Play store icon
هەڵوێستی وەزارەتی پێشمەرگە لەسەر زیادبوونی هێرشەکانی داعش لە عێراق

ناس کورد-

وەزارەتى پێشمەرگەى حکومەتى هەرێمى کوردستان جەختدەکاتەوە لەسەر مانەوەى مەترسی داعش و لەناونەچوونى ئەو ڕێکخراوە، هەروەها پێویستى هەماهەنگى نێوان پێشمەرگە و سوپا بۆ ڕوبەڕووبونەوەى.

کەناڵی ناس کورد لە تێلیگرام جۆین بکە   

 

ماوەى چەند ڕۆژێکە داعش چەندین هێرشى کردووەتە سەر هێزە عێراقییەکان لەناوچە جیاجیاکان کە بەشێکیان لەناوچە جێناکۆکەکان بوون.

 

جەبار یاوەر، ئەمنیدارى گشتى وەزارەتى پێشمەرگە بە ناس کوردى ڕاگەیاند، "ئێمە پێشتر چەندینجار هۆشداریمانداوە کە داعش لەناو نەچووە و مەترسی هەر ماوە، تەنها ئەوەیە کە خاکى بەدەستەوە نەماوە".

 

وتیشى "هێزەکانى پێشمەرگە لەدواى ساڵى 2017 ەوە لەئامادەباشیدان و لەخاڵەکانى خۆیان جێگیربوون و گۆڕانکاریی بەسەر بڵاوبوونەوەى هێزەکانماندا نەهاتووە لەو کاتەوە تا ئێستا".

 

جەبار یاوەر باسى لەوەشکرد، کە پێشتر چەندینجار داوایانکردووە سوپاى عێراق و پێشمەرگە هەماهەنگى بکەن بۆ روبەڕووبونەوەى داعش و ئەوە رێگەچارەى بەرەنگاربوونەوەى ئەو رێکخراوەیە بەتایبەتى لەناوچە جێناکۆکەکان.

 

ڕاگەیاندنى سەرکەوتن بەسەر داعشدا لەلایەن حەیدەر عەبادییەوە، لەمانگى 12ى ساڵى 2017دا بەس نەبوو بۆ کۆتایی هێنان بەو ڕێکخراوە، بەڵکو چەند مانگێکى کەم دواى ئەو ڕاگەیاندنە هێرشەکانى داعش دەستیپێکردەوە.

 

لەدواى ڕووداوەکانى 16ى ئۆکتۆبەرەوە وەزارەتى پێشمەرگە چەندینجار داواى لە بەغدا کردووە پێکەوە ئەو ناوچانە بەڕێوەببەن، بەڵام هێشتا بەغدا لەو بارەیەوە رەزامەندى نەداوە، هەرچەندە لیژنە هاوبەشەکانى هەردولا چەندین کۆبوونەوەیان کردووە لەو بارەیەوە.

 

هێرشەکانى داعش بەدرێژایی دوو ساڵى ڕابردوو تا ئەم ماوەیەى دوایی، بەچەندین شێواز بوون، لەوانە هێرشکردنە سەر خاڵەکانى پشکنین، کاروانى ئۆتۆمبیلى سەربازى، رفاندنى خەڵک و ئازادکردنى بە پارە، چالاکییەکانیشى زیاتر لە شێوەى شەڕى پارتیزانیدا کە لە رێگەى چەند چەکدارێکەوە ئەنجامیداوە و دواتر گەڕاونەتەوە.

 

بەڵام هێرشەکانى چەند رۆژى ڕابردووى ئەو رێکخراوە زیاتر لە هێرشێکى رێکخراو دەچوون بەراورد بەو هێرشانەى پێشتر، بەو پێیەى لەیەک کاتدا چەندین هێرشیان دەکردە سەر هێزە عێراقییەکان.