گه‌ڕان

Shadow Shadow
سیاسه‌تی

سەرۆکی ئەنجومەنی پارێزگای سلێمانی: لامەرکەزییەت گوزارشت لە دوو ئیدارەیی ناکات

2020.05.04 - 12:40
سەرۆکی ئەنجومەنی پارێزگای سلێمانی: لامەرکەزییەت گوزارشت لە دوو ئیدارەیی ناکات

ناس کورد-

لیژنەی ئامادەکاری سیستەمی لامەرکەزی لە ئەنجوومەنی پارێزگای سلێمانی یەکەمین کۆبوونەوەی خۆی ئەنجامدا و سەرۆکی ئەنجومەنی پارێزگای سلێمانیش دەڵێت، بەهیچ شێوەیەک پڕۆژەکەیان گوزارشت لە دوو ئیدارەیی ناکات، دەشڵێت، پارتیش لە لیژنەکە نوێنەری هەیە و ئامادەی کۆبوونەوەکان دەبێت.

 

 

 

ئازاد محەمەد ئەمین، سەرۆکی ئەنجومەنی پارێزگای سلێمانی و سەرۆکی لیژنەکە بە ناس کوردی ڕاگەیاند: "کۆبوونەوەکەی ئەمڕۆمان تایبەتە بە داڕشتنی پلان و بەرنامەکانمان و دەستکردن بە کارەکانمان، لیژنەکەشمان لە نۆ کەسەوە بوو بە 11 کەس، چونکە هەردوو لیستی کۆمەڵ و رافیدەین داوایان کرد بەشداربن لە لیژنەکەدا".

 

سەبارەت بەو دەنگۆیانەی باس لەوە دەکەن مەبەست لە پلانی لامەرکەزی بۆ جیاکردنەوە سلێمانی و دروستکردنەوەی دوو ئیدارەییە لە هەرێمی کوردستان، سەرۆکی ئەنجومەنی پارێزگای سلێمانی ئاماژەی بەوەکرد: "لە لیژنەکەمان کۆى نوێنەرانی هەموو فراکسیۆنەکانی ئەنجومەنی تێدایە بە فراکسیۆنی پارتیشەوە، پڕۆژەکەمان هیچ گوزارشتێکی تێدانیە بۆ دروستکردنی دوو ئیدارەیی و پڕۆژەکە بۆ مەبەستی سیستمی لامەرکەزییە لەڕووی کارگێڕی و داراییەوە و دواتر ئێمە پڕۆژەکە دەخەینە بەردەستی ئەنجومەنی وەزیران و چاوەڕێی وەڵامی ئەوان دەکەین".

 

 هاوکات لەبارەی ئەوەی لە ئەگەری جێبەجێکردنی سیستمی لامەرکەزیدا، ئەوکات پارێزگای سلێمانی لەڕووی داراییەوە دەبەسترێتەوە بە حکومەتی عێراقەوە، ئازاد حەمە ئەمین باسی لەوەکرد: "بابەت و پلانەکەمان لەئێستادا بەهیچ شێوەیەک شتێکی وای تێدانییە ئاڕاستەکەی بگۆڕین بۆ بەغدا، بەڵکو پڕۆژەکە ڕێکدەخرێت و دەنگی لەسەر دەدرێت و  ئاڕاستەی حکومەتی هەرێم دەکرێت، دواتر بۆ خەڵک و میدیاکان ڕوندەکرێتەوە کە پڕۆژەکە چۆنە و چی تێدایە، بەڵام بەگشتی پڕۆژەکە لەچوارچێوەی حکومەتی هەرێمی کوردستاندایە".

 

لەبارەی ئەوەی ئەگەر حکومەتی هەرێم پڕۆژەکەی ڕەتکردەوە، هەڵوێستیان چی دەبێت، سەرۆکی ئەنجومەنی پارێزگای سلێمانی دەڵێت: "هەرکات پڕۆژەکەمان دایە ئەنجومەنی وەزیران، هیوادارین وەڵامێکی ئەرێنمان بدەنەوە، بۆ ئەوەی بتوانین ئەم سیستەمە پەیڕەو بکەین، ئەگەر ڕەتیشکرایەوە ئەوکات دەگەڕێنەوە بۆ ڕای ئەنجومەن کە چ بڕیارێک بدەن".

 

 

ئازاد حەمەدەمین ئاماژەی بەوەشکرد، لە هەموو ئەو وڵاتانەی سیستمی لامەرکەزی تێدا پەیڕەو دەکرێت، سەرکەوتوو بووە و پەشیمان نەبوون لە جێبەجێکردنی ئەو سیستەمە و باشترین ئەنجامی بەڕێوەبردنی هەبووە و ئومێد دەکەن پڕۆژەکەی ئەوانیش بەهەمانشێوە بێت.