گه‌ڕان

Shadow Shadow
سیاسه‌تی

سوپای عێراق هێرشی پێچەوانەى بۆسەر داعش لە سەڵاحەدین و دیالە و ئەنبار دەستپێکرد

2020.05.03 - 15:35
App store icon Play store icon Play store icon
سوپای عێراق هێرشی پێچەوانەى بۆسەر داعش لە سەڵاحەدین و دیالە و ئەنبار دەستپێکرد

ناس کورد-

هێزە ئەمنییەكانی عێراق ئۆپەراسێۆنێكی بەرفراوانیان بۆ ڕاوەدونانی پاشماوەی چەكدارانی داعش دەستپێکرد کە بەمدواییانە هێرشی تیاندا ئەنجامدا و دەیان کوژراوی لە ڕیزی هێزە ئەمنییەکان لێكەوتەوە بەتایبەت لە ڕیزەكانی حەشدی شەعبی.

کەناڵی ناس کورد لە تێلیگرام جۆین بکە   

 

بەگوێرەی هەواڵی میدیاكانی عێراق، ئۆپراسیۆنەکان بە فەرمانی فەرماندەی گشتی هێزە چەكدارەكانی عێراق بووە و لە چەند ناوچەیەکی پارێزگاکانی سەڵاحەدین و خۆرئاوای دیالە و ئەنبار بەڕێوەدەچێت.

 

بەرەبەیانى دوێنێ شەممە، 2ی ئایاری 2020، چەکدارانى داعش هێرشى بەرفراوانیان کردە سەر چەند ناوچەیەکى عێراق و دواى پێکدادانى سەخت هێزە ئەمنییەکان توانیان هێرشەکە تێکبشکێنن.

 

هێرشەکانى داعش بۆ سەر چەند ناوچەیەک بوون لە باشورى تکریت، کە چەندین کوژراو و بریندارى لێکەوتەوە.

 

سەرچاوەیەكی سەربازی بە ناس كوردی ڕاگەیاند، دوای هێرشە بەرفراوانەكەی داعش لەچەند قۆڵێكەوە بۆ سەر ناوچەیەكی عێراق لەئێستادا دۆخەكە ئارامە و لەژێر كۆنترۆڵی هێزە ئەمنیەكاندایە ئەوەش دوای گەیشتی پاڵپشتی زەمینی و ئاسمانیی.

 

وتیشى، "پاڵپشتیە زەمینی و ئاسمانیەكان گەیشتوونەتە ئەو ناوچانەی كە بەرهێرشە تیرۆریستیەكە كەوتوون و ئێستا ناوچەكە لەژێر كۆنترۆڵدایە گەرچی ژمارەیەكی زۆر لەچەكدارانی حەشدی عەشائیری و حەشدی شەعبی و چەند کەسێک لەهێزە ئەمنییەكان كوژران".

 

ئاماژەی بۆ ئەوەشكرد، هێزە ئەمنییەكان سەركەوتن و شکستیان بە هێرشەکەى داعش هێنا، دواى کوشتن و بریندارکردنى چەندین چەکدار.

 

لاى خۆیەوە، لە ڕاگەیەنراوێكدا سەرایا سەلام ڕایگەیاند، دوای هێرشەكەی داعش بۆ سەر چەند ناوچەیەك لەچەند قۆلێكی جیاوازەوە ئێستا هەموو ئەو ناوچانە سەلامەتن و لەژێر كۆنترۆڵدان، هێرشەكەی سەڵاحەدین بووە هۆی كوژرانی 10 كەس لە عەشیرەتی ئەبو عیسا و كوژرانی 10 كەسی تر لەپارێزگى بەسرە لەكاتی ڕووبەڕوبونەوەی هێرشەكەدا.

 

ئاماژەی بۆ ئەوەشكردووە، ناوچەكانی سامەڕا و ئیسحاقی و جەزیرەی سامەڕا و جەلام و شارۆچكە بەلەد و دەریاچەی ڕەساسی و سناش، هەمووی لەژێر كۆنترۆڵدان و سەلامەتن و هیچ هێرشێكیان نەكراوەتە سەر و چەکدارانى داعش دزەیان نەكردووەتە ناوییەوە.

 

یەكێك لە شێخە دیارەكانی عەشیرەتی ئال ئەبو عیساش لە ڕاگەیەنراوێكدا باسی ئەو كوژراوانەی كرد كە لە هێرشەكەی داعشدا بۆسەر ناوچەکانى سەڵاحەدین كوژراون و سەر بەهێزەكانی حەشدی عەشائیرن.

  

لەو هێرشەی كرایە سەر ناوچەی تەل زەهەب، لیوایەكی سەر بە عەسائیبی ئەهلی هەق بەناوی فەلاح مەهدی عەبدولزەهرە كوژرا.

 

هەر لەو چوارچێوەیەشدا، بەڕێوەبەرێتی ڕاگەیاندنی دەستەی حەشدی شەعبی ڕاگەیەنراوێكی بڵاو كردەوە و ڕایگەیاند، بەرەبەیانی ڕۆژی شەممە، ناوچەی مكیشیفە و تەل زەهەب و یەسرب و مەتیبیجە و شارۆچكەی دۆر ڕوبەڕووی هێرشێكی چەكدارانی داعش بوونەتەوە.

 

ئاماژە بۆ ئەوەش كراوە، هێزەكانیان ڕوبەڕووی چەكدارانی داعش لە ناوچەكانی میكیشفە و بەلەد لەباشوری تكریت بونەتەوە.

 

باسی لەوەش كردووە، هێزەكانی حەشد،چەندین چەكداری داعشیان كوشتووە و شەرێكی خوێناوی ڕوویداوە و دواترناوچەكە گەمارۆ دراوە بۆ گەڕان بەدوای چەكدارانی داعشدا، دوای گەیشتنی پاڵپشتی زەمینی و ئاسمانی.

 

ئەوەش خراوەتە ڕوو، لەو شەڕو پێكدانانەدا 10 چەكداری حەشد كوژران و لەگەڵ چەند بریندارێكدا و فەوجی دیجلەش 9 چەكداری كوژراوە لەگەڵ كوژرانی لیوای 41 لەناوچەی تەل زەهەب.