گه‌ڕان

Shadow Shadow
سیاسه‌تی

قەیرانێکى نوێ ڕووی لە کەرتى نەوتى عێراق کردووە.. کۆمپانیاکان ڕازی نابن

2020.05.01 - 10:21
App store icon Play store icon Play store icon
قەیرانێکى نوێ ڕووی لە کەرتى نەوتى عێراق کردووە.. کۆمپانیاکان ڕازی نابن

ناس کورد-

کۆمپانیا نەوتییە بیانییەکان لە عێراق ڕەتیانەکردووەتەوە پابەندبن بە کەمکردنەوەى بەرهەمهێنانى نەوتەوە، ئەوەش ئەو وڵاتەى روبەڕووى قەیرانێکى نوێ کردووەتەوە، لەکاتێکدا ڕەزامەند بووە لەسەر ڕێککەوتنەکەى ئۆپیک پڵەس لەو بارەیەوە.

کەناڵی ناس کورد لە تێلیگرام جۆین بکە   

 

ئاژانسى ڕۆیتەرز ئەمڕۆ هەینى (1ی ئایارى 2020) لەزارى چەند سەرچاوەیەکى کەرتى نەوتەوە گواستییەوە دەڵێت، بەغدا روبەڕووى گرفت بووەتەوە بۆ کەمکردنەوەى ئاستى بەرهەمهێنان بە بڕى ملیۆنێک بەرمیلى ڕۆژانە یان 23%ى ئاستى بەرهەمهێنان لەم مانگەوە لە چوارچێوەى ڕێککەوتنى ڕوسیا و بەرهەمهێنەرانى دیکەن چونکە نەگەیشتووە بە رێککەوتن لەگەڵ کۆمپانیا جیهانییەکان لەو بارەیەوە.

 

کۆمپانیاکانى وەکو بی پی و ئیسکۆن مۆبیل و لۆک ئۆیل و ئینى پشکى شێریان هەیە لە بەرهەمهێنانى نەوتى عێراق و تائێستا داواکانیان بۆ کەمکردنەوەى ئاستى بەرهەمهێنان ڕەتکردووەتەوە، ئەوەش بەرپرسانى عێراقى هانداوە کە پێداچونەوە بکەن بە بژاردەکانیان وەکو داواکردن لە کۆمپانیاکان بۆ گەورەکردنى ئاستى کارەکانى چاکسازى لە کێڵگەکان.

 

پابەندبوونى کەمترى عێراق بە ڕێککەوتنى کەمکردنەوەى بەرهەمهێنان بەشێوەیەکى چاوەڕوانکراو زیاندەگەیەنێت بە هەوڵى ئۆپیک پڵەس بۆ کەمکردنەوەى 9.7 ملیۆن بەرمیل نەوتى ڕۆژانە، بە ئامانجى بەرزکردنەوەى نرخى نەوت.

 

بەرپرسێکى گەورە لە کۆمپانیاى نەوتى بەسرە کە بەشدارە لە دانوستانەکان دەڵێت، "گفتوگۆکان لەگەڵ کۆمپانیا بیانییەکان بەردەوامە و هەوڵدەدەین بگەینە ڕێککەوتن بۆ کەمکردنەوەى بەرهەمهێنان بەشێوەیەک کە زیانى دارایی بە عێراق نەگەیەنێت".

 

وتیشى دانوستانەکان لەسەر ڕێژەى ئەو نەوتەیە کە پێویستە هەر کۆمپانیایەک لە کاتێکى دیاریکراودا کەمیبکاتەوە.

 

بەپێی ڕاپۆرتەکەى ڕۆیتەرز، کۆمپانیاکانى بی پی و ئیکسۆن مۆبیل و لۆک ئۆیل ڕەتیانکردووەتەوە لەو بارەیەوە قسە بکەن.

 

دوو بەرپرسەکەى کۆمپانیاى نەوتى بەسرە دەڵێن، عێراق وەڵامى ئیجابی پێگەیشتووە لە دوو کۆمپانیاوە کە لە بەسرە کاردەکەن لەبارەى کەمکردنەوەى بەرهەمهێنان و پێشنیازى کارکردن لە چاککردنەوەى ئاسایی کێڵگەکان لەو کاتەدا، بەبێ ئەوەەى وردەکاریی زیاتر بخاتەڕوو.

 

ئاماژەیان بەوەشکردووە، وەزارەتى نەوت داواى لە کۆمپانیاى نەوتى بەسرە کردووە لانى کەم بەرهەمهێنانى 700 هەزار بەرمیل کەمبکاتەوە، بەڵام تا ئێستا دیار نییە پشکى کۆمپانیاکان چۆن دەبێت، رێژەکەى دیکەش لە پارێزگاکانى دیکەى وەک میسان و ناسریە دەبێت.

 

بەوتەى بەرپرسان، ڕیژەى گەورەى کەمکردنەوەى بەرهەمهێنان لە کێڵگەکانى باشورى بەسرە دەبێت، کە لەلایەن کۆمپانیا بیانییەکانەوە گەشەیان پێدراوە، لەناویاندا ڕومێلە کە لەلایەن (بی پی)ـیەوە بەڕێوەدەبرێت و ئاستى بەرهەمهێنانى رۆژانەى 1.45 ملیۆن بەرمیلە، لەگەڵ کیڵگەى خۆرئاواى قورنە-1 کە لەلایەن ئیکسۆن مۆبیلەوە بەرێوەدەبرێت و ئاستى بەرهەمهێنانى زیاترە لە 450 هەزار بەرمیلى رۆژانە.

 

کیڵگەکانى دیکە کە کەمکردنەوەى بەرهەمهێنان دەیانگرێتەوە بریتین لە، خۆرئاواى قورنە-2 کە لەلایەن لۆک ئۆیلى روسیەوە بەرێوەدەبرێت و ئاستى بەرهەمهێنانى 400 هەزار بەرمیلى رۆژانەیە، لەگەڵ کێڵگەى زوبێر کە ئاستى بەرهەمهێنانى 250 هەزار بەرمیلە و کۆمپانیاى ئینى بەرێوەیدەبات.

 

بەرپرسانى کەرتى نەوت پێشبینى ناکەن هیچ کەمکردنەوەیە لە بەرهەمهێنانى نەوتى کەرکوک رووبدات، کە ئاستى بەرهەمهێنانى ڕۆژانەى 320 هەزار بەرمیلە، چونکە زۆربەى دەدرێت بە پاڵاوگە بچوکەکان.