گه‌ڕان

Shadow Shadow
سیاسه‌تی

ڕۆژنامەى فەرمى عێراق: لایەنە شیعەكان گڵۆپی سەوزیان بۆ مستەفا كازمی هەڵكردووە

2020.04.29 - 13:25
App store icon Play store icon Play store icon
ڕۆژنامەى فەرمى عێراق: لایەنە شیعەكان گڵۆپی سەوزیان بۆ مستەفا كازمی هەڵكردووە

ناس کورد-

ڕۆژنامەی سەباحی نزیك لە حكومەتی عێراق بڵاویکردەوە، لایەنە شیعەكان لە دواهەمین كۆبوونەوەیاندا لەگەڵ مستەفا كازمی ڕاسپێردراو بۆ پێكهێنانی كابینەی نوێ حكومەت گڵۆپی سەوزیان بۆ هەڵكردووە و ئامادەی پاڵپشتیی كردنیان بۆ دەربڕیوە، پەرلەمانتارێكی كوردیش دەڵیت، شیعەكان نایانەوێت كازمی بخەن بەڵام كیشەیان لەسەر پۆستە وەزارییەكان هەیە، بەلای پەرلەمانتارێكی سائیرونیشەوە كازمی لە تەنگەژەدایە.

کەناڵی ناس کورد لە تێلیگرام جۆین بکە   

 

سەرچاوەیەك لە پەرلەمانی عێراقەوە بە ڕۆژنامەكەی ڕاگەیاندووە، كازمی لەگەڵ لایەنە سیاسیە شیعەكاندا چەند هەنگاوێكی گرنگی بڕیوە و ڕێكەوتنێكی نوێ لەنێوانیاندا لەسەر پێكهێنانی كابینە نوێیەكەی هاتووەتە كایەوە و لایەنە شیعەكان گڵۆپی سەوزیان بۆ بەرنامە و كابینەكەی بۆ پەرلەمان هەڵكردووە و داوایان كردووە لە سەرەتای هەفتەی داهاتوودا دانیشتنێكی نائاسایی بۆ متمانە پێدانی بەڕێوەبچێت.

 

بەڵام دەوڵەتی یاسا و سادیقون ڕەتیانكردووەتەوە  كاندیدە وەزارییەكان دیاری بكەن، باسم خەسانی پەرلەمانتار بە ڕۆژنامەكەی وتووە، زۆربەی لایەنە سیاسیەكان ناوەكانیان بەسەر كازمیدا سەپاندووە.

 

هاوکات ئاڵا تاڵەبانی، ئەندامى پەرلەمانى عێراق باسى لەوەکردووە، لایەنە سیاسیەكان هەوڵدەدەن كازمی ناچار بكەن بەڕازیكردنی مەرجەكانیان بۆ دابەشكردنی پۆستە وەزارییەكانی كابینەكەی.

 

لای خۆشیەوە جاسم بەخاتی، پەرلەمانتاری ڕەوتی حیكمە ڕایگەیاندووە، كۆبونەوەكەی شەوی ڕابردووی لایەنە شیعەكان هەموو شتێكی لەبارەی كابینە وەزارییەكەی كازمییەوە یەكلاكردووەتەوە و لەسەر تێپەڕاندنی قۆناغە كە ڕێكەوتوون.

 

هەر لەو چوارچێوەیەشدا، محمەد كەربولی، پەرلەمانتاری هێزە عێراقییەكان ڕایگەیاندووە، 

 

هەموو لایەنە سیاسیەكان بڕیاریانداوە پشتگیری كازمی بكەن بۆ تێپەڕاندنی كابینەكەی بەڵام كێشەكە لەسەر وردە ناكۆكی لەبارەی دابەشكردنی پۆستەكاندا ماوە و كازمیش دەچێتە پەڕلەمان.

 

ئاماژەی بۆ ئەوەشكردووە، ئێستا كازمی سەرقاڵی چارەسەركردنی ناكۆكیەكانیەتی لەگەڵ لایەنە شیعەكاندا و بەوەش قۆناغێكی گرنگ بەرەو ڕێكەوتنەكان دەبڕێت.

 

بەڵام بەدر زیادی كە پەرلەمانتاری هاوپەیمانی سائیرونە هەندێك بۆچونی پێچەوانەی هەیە و دەڵێت، سەرەتا كازمی شكستی هێنا و نەیتوانی سود لەوانەی پێش خۆی بۆ پێكهێنانی كابینەكەی وەربگرێت، كاتێك ئازادی بەخشییە لایەنە سیاسیەكان بۆ دیاریكردنی كابینە وەزارییەكەی و دواتریش ڕەتكرایەوە لەلایەن هێزێكی گەورەی شیعەوە.

 

زیادی ئاماژەی بۆ ئەوەشكردووە، هەڵوێستی كازمی لەئێستا پڕ ئاستەنگە و ناتوانێت كابینە وەزارییەكەی بەتەواوەتی پێكبهێنیت و دوو ڕێگەی لەبەردەمدایە، یا ئەوەتا بەرەو كابینەیەكی سەربەخۆ هەنگاوبنێت كە ئەمە بەلای لایەنە سیاسیەكانەوە ڕەتدەكرێتەوە، یاخود ئەوەیە داوای لێبوردن بكات.

 

هەروەها ئاڵا تاڵەبانی دەڵێت، هەندێ لایەنی سیاسی دەیانەوێت دەست لەچەند پۆستێكی وەزاری هەڵبگرن بەڵام ڤیتۆیان خستووەتە سەر كاندیدی لایەنەكانی تر و ئەوەش گرفت دروست دەكات بەڵام لایەنە سیاسیەكان نایانەوێت شكست بەكابینەكە بهێنن بەڵام دەیانەوێت بیخەنە ژێر مەرجەكانیەوە.

 

لاى خۆشیەوە، نوری مالیكی لە ڕاگەیەنراوێکدا لەبارەی مەرجەكانیان لەكابینەكەی مالیكیدا ڕایگەیاندووە، وەزیریان پێشكەش نەكردووە و ئەوان كابینەكەیەكی وەزاری سەركەوتوویان بەلاوە مەبەستە.

 

هەر لەسەر وردەكاری ڕێكەوتنی لایەنە شیعەكان لەسەر كابینەكەی كازمی ، سەعد شاكر خەزعەلی  پەرلەمانتاری سادیقون ڕایگەیاندووە، فراكسیۆنەكەیان بەشداری لەكۆبونەوەی لایەنە سیاسیەكاندا نەكردوە بەڵام هاوپەیمانی فەتحی بۆ ئەو كارە سەرپشك كردووە و ئەوان مەرج و كاندیدیان نیە بۆ كابینە وەزارییەكەی مستەفا كازمی.

 

لای خۆشیەوە، دیلان غەفور، پەرلەمانتاری یەكێتی لە پەرلەمانی عێراق ڕایگەیاندووە، كورد لەگەڵ پێكهێنانی كابینەكەدا مامەڵە دەكات هەروەكو چۆن لایەنەكانی تر مامەڵە لەگەڵ پرسەكەدا دەكەن و گەر كابینە وەزارییەكەش لەسەر بنەمای ئیستحیقاقی هەڵبژاردن و مافی پێكهاتەكان دا دابمەزرێت ئەوانیش داوای مافی خۆیان دەكەن و گەر لایەنەكانی تریش ئەو خواستەیان نەبوو ئەوانیش بەهەمان شێوە مامەڵە دەكەن.

 

ئاماژەی بۆ ئەوەش كردووە، كورد هۆكاری كێشە و ململانێكان نابێت بۆ پێكهێنانی كابینەكە و بەهەمان شێوەی مامەڵەی ماڵی شیعی لەگەڵ پرسەكەدا دەجوڵێنەوە.