گه‌ڕان

Shadow Shadow
سیاسه‌تی

تەندروستی هەرێم پلانی چییە لەدوای تۆمارکردنی 18 حاڵەتی نوێی کۆرۆنا؟

2020.04.28 - 20:49
App store icon Play store icon Play store icon
تەندروستی هەرێم پلانی چییە لەدوای تۆمارکردنی 18 حاڵەتی نوێی کۆرۆنا؟

ناس کورد-

لەدوای سوککردنی قەدەغەی هاتوچۆ لەسەر هاووڵاتیان، لەماوەی دوو ڕۆژدا 18 حاڵەتی نوێی کۆرۆنا لە هەرێمی کوردستان تۆمارکرا، وتەبێژی وەزارەتی تەندروستیش دەڵێت، مەترسییەکانی کۆرۆنا هاوشێوەی هەفتەکانی ڕابردوو ماون و سووکردنی قەدەغەی هاتوچۆ لەسەر هاووڵاتیان زوو بوو.

کەناڵی ناس کورد لە تێلیگرام جۆین بکە   

 

محەمەد قادر خۆشناو، وتەبێژی وەزارەتی تەندروستیی هەرێمی کوردستان بە ناس کوردی وت: "مەترسییەکانی ڤایرۆسی کۆرۆنا لە هەموو جیهان و لە هەرێمی کوردستانیش بەردەوامە و وەکو هەفتەکانی ڕابردوو مەترسیی بڵاوبوونەوەی ڤایرۆسەکە و توشبوونی سەدان کەس هەیە".

 

وتیشی، سوککردنی قەدەغەی هاتوچۆ لەسەر هاووڵاتیان بڕیارێکی زوو بوو، هەرچەندە قەدەغەی هاتوچۆ لانەبراوە، بەڵام هاووڵاتیان بە هەڵە تێگەشتوون و وادەزانن مەترسییەکانی کۆرۆنا نەماوە و پابەندی ڕێنماییەکان نابن.

 

دەربارەی پلانەکانی داهاتوویان، وتەبێژی وەزارەتی تەندروستی ئاماژەی بەوەکرد، تائێستا پلانیان نییە بۆ دووبارە قورسکردنەوەی قەدەغەی هاتوچۆی هاووڵاتیان، بەڵام ئەگەر پێویست بکات ئەوا دەیکەنەوە.

 

داوای لە هاووڵاتیانیش کرد بۆ پاراستنی خۆیان و کەسوکاریان وەک ڕابردوو پابەندی ڕێنماییەکان بن و جەختیکردەوە: "مەترسییەکانی کۆرۆنا ماون و ئەگەر ئاگاداری خۆمان نەبین ئاوا توشی کارەساتی گەورە دەبین".

 

ئەمە لەکاتێکدایە، لەماوەی ڕابردوودا تۆمارکردنی حاڵەتی توشبوون بە کۆرۆنا لە هەرێمی کوردستان کەمی کرد و ماوەی شەش ڕۆژ هیچ حاڵەتێک تۆمار نەکرا، بەڵام دوای سوککردنی قەدەغەی هاتوچۆ لەسەر هاووڵاتیان و لە هەفتەی ڕابردوودا چەند حاڵەتێک تۆمارکران و ئەمڕۆ و دوێنێش 18 حاڵەتی نوێی ڤایرۆسەکە تۆمار کرا.

 

کۆی گشتی توشبووانی کۆرۆنا لە هەرێم گەیشتووەتە 366 حاڵەت، 322 توشبوو چاکبوونەتەوە و پێنج کەسیش بەهۆیەوە مردوون.