گه‌ڕان

Shadow Shadow
سیاسه‌تی

شاسوار عەبدولواحید هۆشداری بە حکومەتی هەرێم دەدات لە ئەگەری دابەشنەکردنی موچە

2020.04.25 - 21:28
App store icon Play store icon Play store icon
شاسوار عەبدولواحید هۆشداری بە حکومەتی هەرێم دەدات لە ئەگەری دابەشنەکردنی موچە

ناس کورد-

سەرۆکی جوڵانەوەی نەوەی نوێ دەڵێت، حکومەتی هەرێم لە زمانی فشار نەبێت لە هیچیتر تێناگات، هۆشداریشدەدات لەوەی ئەگەر حکومەت کێشەی موچە چارەسەر نەکات و پلانی نەبێت، ئەوا پشتگیری خۆپیشاندان دەکەن و لەگەڵ هاووڵاتیاندا دەڕژێنەسەر شەقامەکان.

،

کەناڵی ناس کورد لە تێلیگرام جۆین بکە   

 

شاسوار عەبدولواحید، سەرۆکی جوڵانەوەی نەوەی نوێ لە هەژماری خۆی لە تۆڕی کۆمەڵایەتی فەیسبوک ڕایگەیاند: " ئەم حکومەتە لە زمانی فشار نەبێت، لە هیچیتر تێناگات، رۆژی 17ی شوباتی 2020، کاتێک بڕیارمان دا کە 22ی شوبات خۆپیشاندان ئەنجام بدرێت، راستەوخۆ وەزارەتەکان و حکومەت کۆمەڵێک بریاریان دا بە مەبەستی هێورکردنەوەی خەڵک و ساردکردنەوە لە خۆپیشاندان،  بەڵام ئێوە پێمبڵێن حکومەت چەندەی لەم بریارانە جێبەجێکرد؟".

،

ئاماژەی بەوەشکردووە: " ئەمەی ئێستا روودەدات شکستی ئەو گرووپەن کە 29 ساڵە حوکمی کوردستان دەکەن (هەرچەندە ناکرێت وشەی حکومەت و حوکمڕانیی بۆ ئەمانە بەکار بێت) بە تایبەتتر لە ئێستادا شکستی ئەم بەناو حکومەتەیە کە پارتیی سەرکردایەتیی دەکات و یەکێتی و گۆڕان بەشدارن تێیدا".

،

 

شاسوار عەبدولواحید هۆشداریشیداوە لەوەی: "ئەگەر ئەم بەناو حکومەتە کێشەی موچە چارەسەر نەکات و پلانێکی تۆکمەی نەبێت بۆ ئیدارەدانی هەرێمی کوردستان و باشکردنی گوزەرانی خەڵک، ئەوە جارێکی تر پشتیوانیی خۆپیشاندان دەکەین لە هەموو شار و شارۆچکەکان و کۆتاییهێنان بەم شێوازە لە حوکمڕانیی کە ئێستا لە هەرێمی کوردستان هەیە".

،

سەرۆکی جوڵانەوەی نەوەی نوێ دەشڵێت: "ئەمە حەقیقەتە و دەبێت دەسەڵات باش بیزانێت، ئەگەر گوزەرانی خەڵک باش نەکەن و موچە نەدەن، ئەوە بزانن خەڵک لێتان قبوڵ ناکەن و چاوەڕێی کاردانەوەی توند بن، ئەوەی لەسەر ئێمەشە وەک جوڵانەوەی نەوەی نوێ، لەگەڵ خەڵکی خۆمان دەبین و شان بە شانی جەماوەر لە هەموو شارەکان دێینە سەر شەقام".

،

وتەکانی سەرۆکی جوڵانەوەی نوێ لەکاتێکدایە، ئەگەرچی لە بەرواری 6ی سەرەتای هەموو مانگێکدا دەست بە دابەشکردنی موچەی فەرمانبەرانی هەرێم دەکرێت، بەڵام تاوەکو ئەمڕۆ شەممە 25ی نیسانی 2020، موچەی مانگی یەکی ئەمساڵی فەرمانبەرانی هەرێم دابەشنەکراوە و هیچ وادەیەکیش بۆ دابەشکردنی دیارینەکراوە.