گه‌ڕان

Shadow Shadow
سیاسه‌تی

ناكۆكیەكانی ناو حەشدى شەعبى دەتەقنەوە.. ئینشیقاق ڕوودەدات

2020.04.25 - 16:03
App store icon Play store icon Play store icon
ناكۆكیەكانی ناو حەشدى شەعبى دەتەقنەوە..  ئینشیقاق  ڕوودەدات

ناس کورد-

دانانی ئەبو فەدەك لە شوێنی ئەبو مەهدی موهەندیس كە هاوڕێیەكی نزیكی قاسمی سولەیمانی بووە، لەگەڵ قۆرخكردنی چەند پۆستێك لە دەستەی حەشدی شەعبی و زاڵبوونی باڵی ئێرانی ناكۆكیەكانی ناو ئەو دامەزراوە سەربازییەى تەقاندووەتەوە و چەند گروپێكی لێ جیابونەتەوە.

کەناڵی ناس کورد لە تێلیگرام جۆین بکە   

.

لەچەند رۆژى ڕابردوودا چوار لیواى حەشدى شەعبى سەر بە مەرجەعیەتى شیعەکان، جێهێشتنى ریزەکانى حەشد و چونیان بۆ ژێر فەرماندەیی هێزە چەکدارەکانى عێراق ڕاگەیاند.

.

هەرچەندە عادل عەبدولمەهدى، فەرماندەى گشتى هێزە چەکدارەکان ڕەزامەندى نەداوە لەبارەى گواستنەوەى ئەو لیوایانە لەدەستەى حەشدى شەعبییەوە بۆسەر فەرماندەییەکە، بەڵام ئەو پرسە پەردەى لەسەر ناکۆکییەکى شاراوەى ناو حەشد هەڵماڵى.

.

بەوتەى چەند سەرچاوەیەکى عێراقى، ئەگەر مستەفا كازمی كابینەكەی پێكنەهێنێت ڕەنگە پلانەكەی مەرجەعیەت ئاستەنگی بۆ دروست بكرێت. لەکاتێکدا پلانەكە پشتیوانی عەلی سیستانی مەرجەعی باڵای شیعەكانی بەدەستهێناوە و چەند كەسێكی نزیكی سەرپەرشتی دەكەن.

.

سەرچاوەکان دەڵێن، ئەو چوار گروپە دەستیان كردووە بەهەڵمەتێك بەمەبەستی قایلكردنی گروپە فەرمییەكانی تر بۆ ئەوەی ئاڕاستەی كاركردنیان بەرەو پەیوەندیكردن بە حكومەتەوە بگۆڕن لەبری مانەوە لەگەڵ حەشدی شەعبیدا.

.

 ئەوەشیان ڕوونكردووەتەوە، وەرچەرخانی ئەو گروپانە پلانی یەكەمە كە مەیسەم زەیدی پیاوی ئاینی نزیك لەسیستانی خستوویەتە ڕوو.

 

.

 

 

چەند ڕۆژێك پێش ئێستا زەیدی لەمیانی كۆبونەوەیەكیدا لەگەڵ كازمی، پشتیوانی ناوبراوی بەدەستهێناوە بەوەی ئەو گروپانەی حەشدی شەعبی كە خۆبەخشانە بچنە ڕیزەكانی هێزەكانی حكومەتەوە یان هەر هێزێكی تری نیزامی نەتوێنیتەوە.

.

هاوكات بەگوێرەی ڕاپۆرتێكی ڕۆژنامەی ئەلمەدای عێراقی، هۆكاری كشانەوە چەند گروپێكی حەشدی شەعبی سەر بەمەرجەعیەتی باڵا پەیوەندی بەدەستوەردانەكانی ئێرانەوە هەیە لەو سوپایەدا.

.

ڕۆژنامەكە لەسەرزاری دوو بەرپرسی پێشووی حەشدەوە بڵاوی كردووەتەوە، دەستەی حەشدی شەعبی كە بەپێی یاسایەكی پەرلەمان چوار ساڵ پێش ئێستا دامەزراوە، گۆڕاوە بۆ دەزگایەكی ئێرانی، ئەوەش كاتێك زیاتر تۆخبووەتەوە باڵێكی سەر بە ئێران دەستی گرتووە بەسەر ئەو دامەزراوەیەدا بەوەش كارەكانی گومانی زۆری دروست كردووە و جیابونەوەی ئەو چوار لیوایەش كاردانەوەی هەژمونكردنی ئێرانە بەسەر ئەو دامەزراوە سەربازییەدا.

.

سەركردەیەكی پێشووی دیکەى حەشد دەڵێت، لەكاتی دامەزراندنیەوە حەشدی شەعبی ڕوبەڕووی ململانێی نێوان چەند باڵێكی ناوخۆیی و باڵی ئێرانی بووەتەوە. لە ئێستاشدا ئەو چوار گروپە سەربازییە كە بە حەشدی عەتەبات ناسراون خۆیان جیاكردووەتەوە لە حەشد و ڕاستەوخۆ چونەتە پاڵ حكومەت.

.

ئەو چوار گروپە کە پێکهاتوون لە گروپی ئیمام عەباس و ئیمام عەلی و لیواكانی ئەڵاو ئەكبەر و پشتیوانانی مەرجەعیەت جەختیانکردوەتەوە کە هەوڵی چاككردنەوەی هەندێك ئاڕاستە دەدەن و دژی هیچ كەس و لایەنێك نین و ئەو جیابونەوەیان بەڕەزامەندی مەرجەعیەتی نەجەف بووە.

.

بەوتەى چەند سەرچاوەیەكی ئاگادار کە بۆ رۆژنامەکە قسەیان کردووە، ئەو چوار گروپە جیابووەوە پێشتر هەڕەشەی جێهێشتنی ڕێزەكانی حەشدیان كردووە بەهۆی قۆرخكردنی باڵی ئێرانیەوە بۆ زۆربەی پۆستە هەستیارەكانی دەستەی ئەو دامەزراوە سەربازیە.

.

باس لەوەشكراوە، بڕیاری جیابونەوەكە دوای ئەوە هاتووە كە ئەبو فەدەك خراوەتە شوێنەكەی ئەبو مەهدی موهەندیس.

.

بەپێی زانیاری میدیا عێراقییەكان، ئەبو فەدەك كە بەخاڵ ناسراوە، یەكێك بووە لەهاوڕێ نزیكەكانی قاسمی سولەیمانی و هەڕەشەی ئەوەش لە فالح فەیاز كراوە لەئەگەری ڕازی نەبوونی لادەبرێت و هادی عامری دەخرێتە شوێنەكەی.

.

عادل عەبدولمەهدی فەرماندەى گشتى هێزە چەکدارەکان لە تەمموزی ساڵی 2019 بڕیاری دووبارە ڕێكخستنەوەی دەستەی حەشدی شەعبی دا و جەختیشی لەوە كردەوە نیەتی ئەوەی نییە ئەو گروپانە تێكەڵی دەزگا سەربازییەكانی تر بكات وەكو هەندێك وای بۆ دەچن.

.

دوای ئەو بڕیارەش عەبدولمەهدی بودجەیەكی زەبەلاحی بۆ دەستەی حەشدی شەعبی تەرخانكرد كە هاوشێوەی بودجەی وەزارەتی بەرگری بوو و بەوەش گومانەكانی تێكەڵ كردنی حەشدی شەعبی بەهێزە نیزامیەكانی حكومەت دوور خستەوە.

.

چەند ڕۆژێک پێش جیابونەوەى ئەو گروپانە، ئەحمەد سافی، نوێنەری مەرجەعیەت لە شاری نەجەف ڕایگەیاند، پڕۆژەیەكی نوێ لە ئارادایە بۆ ئەو گروپە چەكدارانە.

.

بەپێی ڕاگەیەنراوێکى فیرقەی عەباس، ناوەڕۆكی پڕۆژەكە بریتیە وەى هەموو باڵێكی حەشدی شەعبی دەبێت نیشتیمانی بن، ئەمەش وەكو ئاماژەیەك بۆ بوونی ئەو باڵانەی سەر بە ئێران.

.

بەپێی وتەی چەند شیكەرەوەیەكی سیاسی، ئەو وەرچەرخانەش بۆ ئەوەیە، سوپای عێراق بەوە تۆمەتبار نەكرێت كە وەلائی بۆ ئێران هەیە.