گه‌ڕان

Shadow Shadow
سیاسه‌تی

بەرپرسى پەیوەندییەکانى هەسەدە: داعش سەرقاڵبوونی جیهانی بە ڤایرۆسی کۆرۆنا قۆستوەتەوە

2020.04.23 - 09:33
App store icon Play store icon Play store icon
بەرپرسى پەیوەندییەکانى هەسەدە:  داعش سەرقاڵبوونی جیهانی بە ڤایرۆسی کۆرۆنا قۆستوەتەوە

 

 

ناس کورد-

بەرپرسی پەیوەندییەکانی هێزەکانی سوریای دیموکرات( هەسەدە) ڕایگەیاند، هێزەکانیان لە ئامادەباشیدان بۆ هەر ئەگەرێکی نەخوازراو دەشڵێت، داعش سەرقاڵبوونی جیهانی بە ڤایرۆسی کۆرۆنا وەک هەلێک قۆستوەتەوە بۆ ئەنجامدانی هێرشەکانی.

.

کەناڵی ناس کورد لە تێلیگرام جۆین بکە   

 

ڕێدۆر خەلیل، بەرپرسی پەیوەندییەکانی هێزەکانی سوریای دیموکرات( هەسەدە) ڕایگەیاند، هێزەکانیان بۆ بەرەنگاربوونەوەی ڤایرۆسی کۆرۆنا کۆمەڵێک ڕێکاریان گرتووەتە بەر و جوڵە سەربازییە ناپێویستەکانیان کەمکردووەتەوە.

.

وتیشی :"وەک ڕێکارێکی خۆپارێزی لە پەتای کۆرۆنا لە ئێستادا هێزەکانمان لە سەربازگەکاندا جێگیربوون وپشکنینی  تەندروستی بەردەوامیش بۆ شەرڤانەکان دەکرێت، لە هەمانکاتیشدا هاوکاری ئیدارەی خۆسەری ڕۆژئاوا دەکەین بۆ جێبەجێکردنی بڕیاری قەدەغەی هاتوچۆ لە ناوچەکانی ژێر دەسەڵاتیان".

.

 ڕێدۆر خەلیل، لە ڕاگەیاندراوەکەدا ئاماژەی بە هاوکارییەکانی حکومەتی هەرێمی کوردستان کردووە بۆ یارمەتیدانی کەرتی تەندروستی ئیدارەی خۆسەری ڕۆژئاوای کوردستان لە بەرەنگاربوونەوەی پەتاى کورۆنا و ناردنی  تاقیگەی تایبەت بە شیکاری ڤایرۆسی کۆرۆنا لەگەڵ ستافی تەندروستی بە فەرمانی نێچیرڤان بارزانی، سەرۆکی هەرێمی کوردستان.

.

بەرپرسی پەیوەندییەکانی هێزەکانی سوریای دیموکرات( هەسەدە) دووپاتیکردەوە کە ئەوان بەردەوام لە ئامادە باشیدان بۆ بەرەنگاربوونەوەی داعش و ئاماژەی بە مەترسییەکانی چەکدارانی داعش کرد وتی" داعش لە ئێستادا سەرقاڵبوونی جیهانی بە ڤایرۆسی کۆرۆناوە وەک هەلێک قۆستوەتەوە بۆ ئەنجامدانی هێرشەکانی لە هەمانکاتیشدا بۆشایی ئەمنی لە ناوچەکە بۆ خۆی بەهەل زانیوە بە تایبەتی پاش کشانەوەی هێزەکانی ئەمریکا، ئەوەش وایکردووە جموجۆڵەکانیان لە ناوچەکانی خۆرهەڵاتی شاری دێرەزور، بیابانەکانی سوریا و ناوچەکانی نزیک سنوری نێوان عێراق و سوریا بە شێوەیەکی بەرچاو زیاد بکات".

.

 ڕێدۆر خەلیل، ئەوەشی ڕوونکردەوە، ڕوسیا هیچ بنکەیەکی سەربازی لە ناوچەکانی ئەواندا نییە، بەهیچ شێوەیەکیش ڕوسیا هێزی خۆجێی لە ڕۆژئاوادا  دروستنەکردوە و لە ئێستاشدا هێزەکانیان لەگەڵ سوپای ڕوسیا لە هەماهەنگییەکی بەردەوامدان.

.

 دەربارەی پەیوەندییەکانی ( هەسەدە) و ڕژێمی سوریا، بەرپرسی پەیوەندییەکانی هێزەکانی سوریای دیموکرات، وتی "پەیوەندییەکانى ئێمە و ڕژێمی سوریا مۆرکێکی سەربازی وەرگرتووە، تەنها قەتیس بوو لەهەماهەنگییە سەربازییەکاندا نەک هەماهەنگی سیاسی و دانوستان، چونکە ئەو بابەتە پەیوەستە بە پیاوانی سیاسەتەوە".

.