گه‌ڕان

Shadow Shadow
سیاسه‌تی

پارێزگاری سلێمانی: هیچ خاوەنکارێک ناتوانێت کرێکارەکانی دەربکات

2020.04.21 - 20:37
App store icon Play store icon Play store icon
پارێزگاری سلێمانی: هیچ خاوەنکارێک ناتوانێت کرێکارەکانی دەربکات

ناس کورد-

پارێزگاری سلێمانی ڕایگەیاند، هیچ کەس و خاوەنکارێک بۆی نییە کرێکاران لەسەر کار دەربکات و پێویستە کرێی دوو مانگیان پێبدرێت، هەر لەوبارەیەشەوە داوایەک ئاڕاستەی ئەنجومەنی وەزیران دەکات.

کەناڵی ناس کورد لە تێلیگرام جۆین بکە   

. 

لە ڕاگەیەندراوێکدا هەڤاڵ ئەبوبەکر، پارێزگاری سلێمانی ڕایگەیاند: "بەناوی پارێزگای سلێمانیەوە سوپاس و پێزانین و پشتیوانیی خۆمان بۆ کرێکاران و خاوەنکارانی بەڕێزی سنوری پارێزگای سلێمانی دەردەبڕین، لەگەڵ ئەوەی زەرەرمەندترین پێکهاتە کۆمەڵایەتیەکانی کۆمەڵگاکەمان بوون، هۆشمەندانە و دانایانە پابەندی تەواوی ڕێنمایی و ڕێکارە تەندروستیی و کارگێڕیی و ئارامییەکان بوون".

 . 

ئاماژەی بەوەشکردووە: : "بۆیە هەموو لایەک ئاگادار دەکەینەوە بەپێی یاسا کارپێکراوەکان پێویستە خاوەنکار لە 14ی ئازاری 2020ەوە تا ماوەی (دوو مانگ) کرێی تەواوی کرێکارەکانی بدات و لەم دۆخەدا مافی دەرکردنی هیچ کرێکارێکیان نییە، تەنها لە بارێکدا نەبێت کە بە ڕێکاری یاسایی و کارگێڕیی و بازرگانیی و پیشەسازی سەلمابێت کە پڕۆژەکە شکستی هێنابێت".

 . 

پارێزگاری سلێمانی ئەوەشی خستووەتەڕوو: "پێویستە حکومەتی هەرێمی کوردستان قەرەبووی دارایی کرێکارانی بیناسازیی ڕۆژانە بکاتەوە کە یاسای خانەنشینیی و دابینکردنی کۆمەڵایەتیی نایانگرێتەوە".

.  

لە ڕاگەیەندراوەکەدا ئەوەش هاتووە، پێویستە حکومەت بڕیاربدات لەسەر هەڵگرتنی باج و ڕسوماتی ئەمساڵ لەسەر پڕۆژەو خاوەن موڵکە بچوک و مامناوەندەکان و ڕاگرتنی پێدانی دەستەبەر لەلایەن خاوەن کارو کرێکارانەوە تاکو ئاسایی بوونەوەی ئەم دۆخانە بۆئەوەی یارمەتیدەری خاوەنکاران بێت بە پێدانی کرێی کاری (دوو مانگ) و غەرامەنەکردنیان لەو ماوەیەدا کە دامودەزگای دەوڵەت لە پشووی زۆرەملێی تەندروستیدا بوون.

 . 

هاوکات پارێزگاری سلێمانی داوای لە ئەنجومەنی باڵای دادوەری هەرێمی کوردستان کردووە، دادگای کار دەست بە دەوامکردن بکەنەوە بۆ ئەوەی هەر کرێکارێک هەڕەشەو ترسی لەسەرکار دەرکردنی لەسەربێت داوای یاسایی تۆمار بکات لەماوەی دیاریکراوی یاساییدا.

.  

ڕونیشیکردووەتەوە: "لە حاڵەتی نەکردنەوەی ئەو دادگایەدا، بەشی یاسایی یەکێتیی سەندیکاکانی کرێکاران ڕاسپێردراون بە پڕکردنەوەی فۆڕمێکی تایبەت بەم بابەتە وەک دۆکیۆمێنتێکی بەڵگەدار تا ئەوکاتەی دادگاکان دەستبە کارکردن دەکەنەوە، بۆ ئەوەی مافی کرێکاران پارێزراو بێت بەپێی یاسا".

. 

لە ڕاگەیەندراوەکەیدا هەڤال ئەبوبەکر ئاماژەی بەوەشکردووە: "دوێنێ دووشەممە پارێزگاری سلێمانی یاداشتێکی یەکێتیی سەندیکاکانی کرێکارانی کوردستانی گەیاندۆتە سەرۆکایەتی ئەنجومەنی وەزیران و وەزارەتی کارو کاروباری کۆمەڵایەتیی و خوازیارین لەپێش 14/ 5/ 2020دا بڕیاری پێویست لەسەر ناوەڕۆکی یاداشتەکەیان بدرێت بۆئەوەی کێشەو بارگرانیی ئابووریی نوێ نەیەتە کایەوەو شاڵاوی بێکاریی و لە کار دەرکردن نەبێتە هۆکاری زیانگەیاندن بەو سەرکەوتنەی بە هیممەت و پلانی حکومەتی هەرێمی کوردستان و حکومەتە خۆجێیەکان و خەڵک و کەرتی تایبەت لە ڕزگاربوون لە پەتای کۆرۆنا هاتۆتە کایەوە".