گه‌ڕان

Shadow Shadow
سیاسه‌تی

ناس کورد داواکارییەکانی یەکێتی و وادەى کۆبوونەوەى لەگەڵ پارتى ئاشکرادەکات

2020.04.20 - 17:11
App store icon Play store icon Play store icon
ناس کورد داواکارییەکانی یەکێتی و وادەى کۆبوونەوەى لەگەڵ پارتى ئاشکرادەکات

ناس کورد-

چاوەڕوان دەکرێت لە دوو ڕۆژى داهاتوودا هەردوو شاندی یەکێتى نیشتیمانى کوردستان و پارتى دیموکراتى کوردستان کۆبینەوە، بۆ گفتوگۆکردن لەسەر کێشەکانى نێوانیان کە لە ئێستادا ڕوویان لە زیادبوون کردووە.

کەناڵی ناس کورد لە تێلیگرام جۆین بکە   

ماوەى چەند هەفتەیەکە چەندین کیشە کەوتونەتە نێوان پارتى و یەکێتییەوە کە بەهۆیەوە پەیوەندییەکانیان ڕووى لە گرژى کردووە، وەکو بارگرژییە چەکدارییەکانى زینى وەرتێ و پرسی بەشدارى یەکێتى لە حکومەت.

.

دواى هەڵکشانى گرژییەکان، دوێنێ مەکتەبی سیاسی پارتى ئامادەیی بۆ کۆبوونەوە نیشاندا، ئەمرۆش نێچیرڤان بارزانى سەرۆکى هەرێم کە هاوکات جێگرى سەرۆکى پارتى یە جەختى لە بژاردەى کۆبوونەوە کردەوە بۆ چارەسەرى کێشەکان.

.

زوبێر عوسمان، ئەندامى ئەنجومەنى سەرکردایەتى یەکێتى بە ناس کوردى ڕاگەیاند، "یەکێتى ئامادەى کۆوبونەوەیە و لەدوو ڕۆژى داهاتوودا کۆبوونەوەکە لەسەر ئاستى مەکتەبی سیاسی هەردوولا دەکرێت، یەکێتى ئامادەیە بۆ چارەسەرکردنى کۆى کێشەکان بە گفتوگۆ".

.

بەپێی زانیارییەکانى ناس کورد، یەکێتى شاندى بۆ کۆبوونەوەکە ئامادەکردووە کە لە چەند ئەندام و کارگێرێکى مەکتەبی سیاسی پێکهاتوون، کە لەناویاندا رزگار عەلى و دەرباز کۆسرەت ڕەسوڵ بوونیان هەیە.

.

زوبێر عوسمان وتى، "هەردولا تێگەیشتنیان هەیە کە بە گفتوگۆ کێشەکان چارەسەر بکرێن، تەنها ئەو بژاردەیەش هەیە چونکە پێشتر بژاردەى دیکە تاقیکراونەتەوە کە ماڵوێرانى بەدواوە بووە، یەکێتى لەگەڵ دوو بەرەکى و دوو ئیدارەییدا نییە".

.

هەفتەى ڕابردوو لەگەڵ زیادبوونى گرژییەکانى نێوان پارتى و یەکێتى لەسەر گرژییەکانى زینی وەرتێ و دانانى سێ بنکەى سەربازى جیا لەو سنورە لەلایەن پارتى و یەکێتى و پەکەکەوە، تیمى یەکێتى لە حکومەت پەیامێکى ناڕەزایی ئاڕاستەى مەسرور بارزانى سەرۆکى حکومەت کرد، دواى ئەوەى بارزانى "هێرشى کردە" سەر یەکێتى.

.

لەبارەى داواکارییەکانى یەکێتى یەوە، زوبێر عوسمان وتى، "ئێمە رێککەوتنى سیاسی و ئیداریمان لەگەڵ پارتى هەیە، دەبێت بەشدارى ڕاستەقین بین لە حکومەتدا و لەسەر ئەوە سازش ناکەین، نابێت تەنها بەشداربین بەڵکو شەراکەتمان دەوێت".

.

پرسی شەراکەتى ڕاستەقینە یەکەمجار نییە کە یەکێتى داوایدەکات، لەچەند مانگى ڕابردووشدا بەهەمان شێوە ئەو حزبە داواى شەراکەتى کرد و بەهۆیەوە پەیوەندییەکانى لەگەڵ پارتى رووى لە گرژى کرد، دواتر بەوتەى خۆیان کێشەکان چارەسەرکران، بەڵام ئێستا دوبارە سەریهەڵداوەتەوە.

.

"لەڕووى سیاسیەوە پارتى و یەکێتى و گۆڕان سێ پێکهێنەرى سەرەکى حکومەتین، دەبێت لە بڕیارى سیاسی وجودمان هەبێت".

.

لەبارەى گرژییەکانى زینى وەرتێوە، ئەو ئەندامەى سەرکردایەتى یەکێتى باسى لەوەکرد، ئەوان دەیانەوێت دۆخەکە بگەڕێتەوە بۆ پێش 23 و 25ى مانگ واتە پێش هاتنى هێز.

.

وتیشى، "لەگەڵ ئەوەشداین هێزى یەکەى 70 یان ئاسایشى ناوخۆى سەر بە حکومەتى هەرێم لەو سنورە هەبێت و حکومەتى هەرێمیش ئەگەر بیەوێت گومرگ دابنێت، نەک هێزى چەکدار و دۆشکە و بیکەیسى".