گه‌ڕان

Shadow Shadow
سیاسه‌تی

چارەنوسى کازمى لەنێوان دوو سیناریۆدا..ئەگەر شكست بهێنێت چى ڕوودەدات؟

2020.04.19 - 16:56
App store icon Play store icon Play store icon
چارەنوسى کازمى لەنێوان دوو سیناریۆدا..ئەگەر شكست بهێنێت چى ڕوودەدات؟

ناس کورد-

بەپێی ڕاپۆرتێكی سەنتەری لێكۆڵینەوەی ئایندەیی لەهەرێمی كوردستان كە كۆمەلێك پسپۆڕ بەڕێوەی دەبەن، دوو سیناریۆ هەن بۆ چارەنوسی مستەفا كازمی بۆ تێپەڕاندنی كابینەكەی، یەكەمیان سەركەوتنە بەهۆی جۆرێك لەسازانی لایەنەكانی شیعە و كورد و سوننە، دووەمیان شكستهێنانە وەكو ئەوانەی پێشووی خۆی.

.

کەناڵی ناس کورد لە تێلیگرام جۆین بکە   

سەنتەرەكە پێشبینی ئەوە دەكات لەهاتنە دی ئەگەری سیناریۆی دووەم، ئیدی ئاستەم بێت مادەی 76 دەستوری بتوانێت ئاڕاستە ئاساییەكەی خۆی وەربگرێت و ناچار ئەوكات دەبێت پەنا ببرێتە بەر مادەیەكی تری دەستوری یاخود هێشتنەوەی عەبدولمەهدی.

.

بەپێی ڕاپۆرتەكە، سیناریۆى یەکەم ئەوەیە كازمی لە ئەرکى پێکهێنانى حکومەتدا سەرکەوتوبێت و بتوانێت بەئاسانى هەم ئەندامانى کابینەکەى بەربژێر بکات و هەم دەنگى زۆرینەى ئەندامانى ئەنجومەنی نوێنەرانیش مسۆگەر بکات، ئەمەش بەرمەبناى ئەو پشتیوانییە ناوخۆیى (کوردى- سوننى- شیعی) و نیمچەهاوڕاییە دەرەکییە (ئێرانى- ئەمریکى)یەى کە لەئانى ڕاسپاردنیدا هەیبوو، ئەمە وێڕاى کەمبونەوەى فشارى خۆپیشاندەران لەسەرى کە بەهۆى ڕێکارەکانى بەرگرتن لە بڵاوبوونەوەى پەتاى کۆرۆناوە تاڕادەیەک وەستاوە.

..

سیناریۆى دووەمیش بەپێی ڕاپۆرتی ئەو سەنتەرە ئەكادیمیە، ئەوەیە چانسى كازمی لە چانسى عەلاوی و زورفی  باشتر نەبێت و سەرلەنوێى ململانێکان ببنەوە کۆسپى رێگەى، کە ڕەنگە لەئاکامدا بەهۆى قایلنەکردنى لایەنێک یان زیاتر لە هێزە ناوخۆییەکان لە شیعە یان کورد و سوننە یان هێزە دەرەکییەکان، لەهەرکاتێکدا لەماوەى ئەو (٣٠) ڕۆژەى کە هەیەتى بۆ پێکەوەنانى کابینەکەى ناچاربکرێت بە کشانەوە، یان لە دواساتدا ئەنجومەنى نوێنەران بۆ متمانە پێدانى ئامادەى کۆبوونەوە نەبێت، یان هەر متمانەى پێنەدات، بەمەش 'کاظمى' لە ئەرکى پێکهێنانى حکومەتدا شکست بهێنێت.

.

بەپێی ڕاپۆرتی سەنتەرەكە لەئەگەری هاتنەدی سیناریۆی دووەمدا ئەوا بۆی هەیە مادەی 76ی دەستووری نەتوانێت لەسەر ئاراستە ئاساییەكەی خۆی بڕوات وپەناببرێتە بەر مادەی 64ی دەستووری دەستور کە شیاوە بۆ دەربازکردنى دۆخەکە بە هەڵوەشاندەوەى ئەنجومەنى نوێنەران وپەنابردن بۆ ئەنجامدانى هەڵبژاردنی پێشوەخت، بەتایبەت ئەگەر خۆپیشاندانەکان دەستپێبکەنەوە، یان بۆ ڕێگرتن لە بەرکاربوونى مادەى (٨١) دەستور کە تایبەتە بە دانانى پۆستى سەرۆکوەزیران بە (خلو - چۆڵ) و جێگرتنەوەى لەلایەن سەرکۆمارەوە تا لەماوەى (١٥) ڕۆژدا کەسێکی­تر بۆ پێکهێنانى حکومەتێک بەپێى مادەی (٧٦) ڕابسپێرێت.

.

سەنتەرەكە وای بۆ دەچێت بۆ ڕێگریكردن لەروودانى ئەو دوو پێشهاتە "دەستورییە مەترسیدارە"  لەسەر پێگەى شیعە و هێزەکانى، ڕەنگە، هێشتنەوەى عەبدولمهدی، تاکە دەرچەى بەردەم ئەو هێزانە بێت بۆ پاراستن و درێژەدان بە بەرژەوەندییە هەنوکەییەکانیان، ئەگەر بۆ ماوەیەکى کورتیشبیت.