گه‌ڕان

Shadow Shadow
سیاسه‌تی

پارتی: لەگەڵ یەکێتی کۆدەبینەوە چونکە زۆر بەرژەوەندی هاوبەشمان هەیە

2020.04.19 - 15:21
پارتی: لەگەڵ یەکێتی کۆدەبینەوە چونکە زۆر بەرژەوەندی هاوبەشمان هەیە

ناس کورد-

کۆبوونەوەی مەکتەبی سیاسی پارتی کۆتاییهات و بە وتەی وتەبێژی حزبەکە، بڕیاریانداوە لەسەر کێشەکانی نێوانیان لەگەڵ یەکێتی کۆببنەوە و دەڵێت، زۆر بەرژەوەندی گەورەیان لەگەڵ یەکێتی هەیە، ئاماژەی بەوەشکرد، پشتگیرییان بۆ مستەفا کازمی دوپاتکردووەتەوە بە مەرجی ئەوەی تایبەتمەندی هەرێم لەبەرچاو بگیرێت و خۆی وەزیرە کوردەکان دیاریبکات.

.

ئەمڕۆ یەکشەممە، 19ی نیسانی 2020، مەکتەبی سیاسی پارتی دیموکراتی کوردستان بە سەرپەرشتی مەسعود بارزانی، سەرۆکی حزبەکە و بە ئامادەبوونی ئەندامانی مەکتەبی سیاسی کۆبوونەوە.

.

مەحمود محەمەد، وتەبێژی پارتی دیموکراتی کوردستان بە ناس کوردی ڕاگەیاند: "تەوەری یەکەمی کۆبوونەوەکە دەربارەی پێکهێنانی کابینەی حکومەتی عێراق بوو بەسەرۆکایەتی مستەفا کازمی و وەک لە سەرەتاوە وەک پارتی وەک هەرێمی کوردستان پشتیوانیمان بۆ دەربڕیوە، ئێستاش ئەو پشتیوانیانە بەردەوامە".

 .

وتیشی: "ئەوەی کە چاوەڕواندەکەین تایبەتمەندی هەرێم لەبەرچاو بگرێت وەک هەرێمێک کە حکومەتی خۆی هەیە، هەروەها لەڕووی ژمارەی وەزیرەکانمان لە بەغدا و ئەوەشی کە هەرێم کێی پێباشە خۆی دیاریبکات".

  .

وتەبێژی پارتی ئاماژەی بەوەشکرد: "تەوەری دووەمی کۆبوونەوەکە دەربارەی ئەو گرژیانە بوو کەماوەیەکە دروست بووە، ئێمە بۆچوونی جیاواز قبوڵ دەکەین، بەڵام ئەگەر دوو حزبی جیاوازیش بین زۆر بەرژەوەندی گەورە کۆماندەکاتەوە، بۆیە باشترە لە ڕاگەیاندنەوە قسە لەگەڵ یەکتر نەکەین و دابنیشین گفتوگۆ بکەین و چارەسەری بۆ بدۆزینەوە".

 .

مەحمود محەمەد باسی لەوەشکرد: "هەردوو حزب  وەک دوو لایەنی سەرەکی حکومەت و لەگەڵ گۆڕان و لایەنەکانی دیکەش پێویستە هەوڵبدەین ئەم قۆناغە تێپەڕێنین بە سەرکەوتن، هەر لەو پێناوەدا وادەیەک دیاریدەکەین و لەگەڵ یەکێتی کۆدەبینەوە".