گه‌ڕان

Shadow Shadow
سیاسه‌تی

پارتى وەڵامى کەجەکە دەداتەوە: بچن كێشەكانتان لەگەڵ توركیا چارەسەر بكەن

2020.04.17 - 21:35
App store icon Play store icon Play store icon
پارتى وەڵامى کەجەکە دەداتەوە: بچن كێشەكانتان لەگەڵ توركیا چارەسەر بكەن

ناس کورد-

پارتى دیموکراتى کوردستان وەڵامى کۆما جڤاکێن کوردستان (کەجەکە)ى دایەوە و ڕایگەیاند، كێشەی پەكەكە لەگەڵ توركیایە و باشتریشە لەبری "شەڕفرۆشی و دروستكردنی سەرئێشە و گرفتی زیاتر" بۆ خەڵكی كوردستان بچن كێشەكانیان لەگەڵ توركیا چارەسەر بكەن.

.

کەناڵی ناس کورد لە تێلیگرام جۆین بکە   

 

ئەمرۆ کەجەکە لە ڕاگەیەنراوێکدا پارتى تۆمەتبارکردبوو بە پێدانی زانیاری بە تورکیا لەبارەى شوێنی ئەو گەریلایانەى کە لە بۆردومانەکەى چوارشەممەى پێشوو بۆ سەر بارەگایەکى پەکەکە لە زینى وەرتێ کوژران.

.

مەکتەبی سیاسی پارتى لە بەیاننامەیەکدا ڕایگەیاند "سەرلەبەری ئەو تۆمەتانە بە توندی ڕەتدەكەینەوە جەختیش لەوە دەكەینەوە كە ئەو هێزانەی كە لە زینی وەرتێ جێگیركراون هێزی پێشمەرگەی سەر بە وەزارەتی پێشمەرگەن  و لە چوارچێوەی ئەو ڕێوشوێنانە لەوێ جێگیر كراون كە حكوومەتی هەرێم بۆ ڕێگەگرتن لە بڵاوبوونی پەتای كۆرۆنا بڕیاری لەسەردا بوو".

.
 ئاماژەى بەوەشکردووە "جێگەی سەرسووڕمانێكی زۆرە كە پەكەكە ئەو مافە بە خۆی بدات لە هەر شوێنێك كە پێی خۆش بێت هێز بنێرێت و دەست لە كاروباری ناوەخۆی هەرێمی كوردستان وەربدات بەڵام بەلایەوە ئاسایی نەبێت كە حكوومەتی هەرێمی كوردستان مومارەسەی دەستەڵاتەكانی خۆی لەسەر خاكی خۆی بكات".
.
 
"ئەوەى تا ئێستایش لە پەكەكە قبوڵ كراوە بە هۆی سینگفراوانی پارتی و هەرێمی كوردستان بووە كە چاوپۆشییان لە زێدڕەۆییەكانی پەكەكە كردووە. حەقیشە سەرانی پەكەكە تەقدیرییان بۆ ئەم هەڵوێستەی خەڵكی كوردستان هەبا و ڕەچاوی بارودۆخی هەرێمی كوردستانیان كردبا و لانیكەم ڕێزی دامودەزگای هەرێم و هاووڵاتیانیان گرتبا كە ساڵانێکی دورودرێژە تەحەمولی بوونی پەكەكەیان لەسەر خاكی هەرێم كردووە".
.
.
مەکتەبی سیاسی پارتى جەختیکردووەتەوە "كێشەی پەكەكە لەگەڵ توركیایە و باشتریشە لەبری شەڕفرۆشی و دروستكردنی سەرئێشە و گرفتی زیاتر بۆ خەڵكی كوردستان بچن كێشەكانیان لەگەڵ توركیا چارەسەر بكەن. گۆڕەپانی كاری ئەوان توركیایە نەك هەرێمی كوردستان".