گه‌ڕان

Shadow Shadow
سیاسه‌تی

پێشنیاری کشانەوەی سەرجەم هێزەکان کراوە

زینی وەرتێ؛ یەکێتی نێوەندگیری لەنێوان پەکەکە و پارتیدا دەکات [تایبەت]

2020.04.16 - 13:46
App store icon Play store icon Play store icon
زینی وەرتێ؛ یەکێتی نێوەندگیری لەنێوان پەکەکە و پارتیدا دەکات [تایبەت]
ناس كورد- سابیر عەبدوڵا یەکێتی نیشتیمانی کوردستان لە رێگەی ئەندامێکی سەرکردایەتی حزبەکەیەوە لە هەوڵی ئاسایکردنەوەی دۆخی زینی وەرتێ-یە و لەو چوارچێوەیەشدا بەوتەی سەرکردە نێوەندگیرییەکەی یەکێتی پێشنیاری کشانەوەی سەرجەمی هێزەکان لەو سنورە کراوە و پەکەکە پێشوازی لەپێشنیارەکەی یەکێتی کردووە و پارتیش هێشتا وەڵامی نەداوەتەوە. . ئارام قادر، ئەندامی سەركردایەتی یەكێتی نیشتیمانی كوردستان بە ناس  كوردی راگەیاند، بۆ چارەسەركردنی ئەو گرفتەی لە زینى وەرتێ دروست بووە سەردانی ناوچەكەی كردووە و پێشنیاری بۆ سەرجەم هێزەكان كردووە كە هێزەكان بكێشننەوە و هیچ بازگەیەك لەزینى وەرتێ بونی نەبێ.   ئارام قادر وتیشى "پەكەكە پێشنیارەكەی قبوڵ كردوین و برادەرانی پارتیش تائێستا وەڵامى پێشنیارەكەیان نەداوەتەوە ". . ئەندامەکەى سەرکردایەتى یەکێتى رونیکردەوە "ئەو هێزەی پارتی لەوێ جێگیرى کردوون بەبڕیارى ڕێگریكردن لە بڵاوبونەوەی ڤایرۆسی كۆرۆنا هاتبوونە ناوچەکە و وا بڕیار بووە لە 1ى نیساندا بکشێنەوە و هیچ بازگەیەک لە سنورەکە نەمێنێت بەڵام وا نزیکەى 15 ڕۆژ بەسەر وادەکەدا تێپەریوە و هێزەکە هەر لەشوێنى خۆیەتى و ئەوەش هەم یەکێتى و هەم پەکەکەى نیگەران کردووە. . جەختیشى کردەوە "خەڵكی كوردستان لەدۆخێكی خرپدا ژیان دەكەن بۆیە نە یەكێتی و نە خەڵك قبوڵی ئەوە ناكات جارێكی تر خەڵك توشی شەڕ و ماڵوێرانی ببێت".   درەنگانێکى شەوى رابردو لە تۆڕە کۆمەڵایەتییەکان گرتەیەکى ڤیدیۆى ناردنى هێز بڵاوکرایەوە و ئاماژە بەوە کرا کە ئەوانە هێزى زێرەڤانین و ڕەوانەى قەزاى سۆران دەکرێن. . ناس کورد لەو بارەیەوە پەیوەندى بە چەند فەرماندەیەکى پارتییەوە کرد بەڵام پەیوەندییەکانیان بەردەست نەبوون.   لەبارەى ناردنى هێزى زیاتر بۆ ناوچەکە، موسڵیح باڵەكی بەڕێوەبەری ناحیەی وەرتێ بە ناس كوردی وت "هێزی لیوای 7 كە لە زینى وەرتێ جێگركراوە بە فەرمانی وەزارەتی پێشمەرگە و بۆ ڕێگری لە بڵاوبونەوەی ڤایرۆسی كۆڕۆنا دانراون و هەر جوڵەیەكی هێزەكان و ئاڵوگۆڕیش هەر لەو چوارچێوەیەدایە و ئەوان لای خۆیانەوە گرفتیان نییە". وتیشى "بەهۆی بۆردومانی فڕۆكە جەنگیەكانی توركیا كە دوێنێ (چوارشەممە) زینى وەرتێی بۆردومان كرد بەهۆیەوە زیان بە تاوەرەكانی چەند کۆمپانیایەکى خزمەتگوزارى پەیوەندیکردن کەوتووە و لە ئێستادا لە هەوڵى چارەسەرکردنى کێشەکەن". . زینى وەرتێ هەردوو قەزای ڕانیە و سۆران بەیەكەوە دەبەستێتەوە و هەروەها چیاكانی قەندیل و هەڵەموت و كارۆخیش بەیەكەوە گرێ دەدات و بەهۆی نەگەیشتنە ئەنجام بۆ دانانی بازگەیەكی هاوبەش لە ناوچەکە هەریەكە لە هێزەكانی  پارتى و یەکێتى و پەکەکە هەریەكەیان بەجیا بازگەیان داناوە. . لە دوو ڕۆژی ڕابردوشدا فڕۆكە جەنگیەكانی توركیا بۆردومانی ناوچەکەیان کرد و بەهۆى بۆردومانەکەوە سێ گەریلای پەكەكە شەهیدبون و زیانی ماددی بەر خانو و ئۆتۆمبێلی هێزەكانی لیوای 7ی پێشمەرگە کەوت. .

کەناڵی ناس کورد لە تێلیگرام جۆین بکە