گه‌ڕان

Shadow Shadow
سیاسه‌تی

بۆچی پێش ڕاگەیاندنی بەرنامەی کابینەکەی کورد پشتگیری بۆ کازمی دەربڕی؟ پێدەچێت ڕێککەوتنی ژێربەژێر کرابێت

2020.04.09 - 21:36
App store icon Play store icon Play store icon
بۆچی پێش ڕاگەیاندنی بەرنامەی کابینەکەی کورد پشتگیری بۆ کازمی دەربڕی؟  پێدەچێت ڕێککەوتنی ژێربەژێر کرابێت
ناس کورد- شەهرام عەزیز لەگەڵ ئەوەی هیچ کارنامەیەکی کابینەکەی ئاشکرا نەکردووە، بەڵام سەرکردایەتی کورد پشتیوانیان بۆ مستەفا کازمی سەرۆکی ئەنجومەنی وەزیرانی ڕاسپێردراوی عێراق ڕاگەیاند، نوسەر و سیاسەتمەدارێکیش دەڵێت، کورد زوو بڕیاریدا لەو پرسە، بەڵام دەکرێت ڕێککەوتنی پێشوەختە و ژێربەژێر کرابێت. ، لەکاتێکدا هەموو جیهان سەرقاڵی بەرەنگاربوونەوەی ڤایرۆسی کۆرۆنان، بەڵام لە عێراق کێشە سیاسییەکان بەردەوامن و لەدوای شکستهێنانی دوو کاندیدی ڕاسپێدراو بۆ پێکهێنانی حکومەت، ئەمڕۆ لەلایەن سەرۆککۆماری عێراقەوە سێیەمین کەس بۆ ئەو پرۆسەیە ڕاسپێردرا. ، هەر پێش بەفەرمی ڕاسپاردنیی، نێچیرڤان بارزانی، سەرۆکی هەرێمی کوردستان پشتیوانی هەرێمی بۆ مستەفا کازمی دەربڕی، دواتریش یەکێتی نیشتیمانیی پشتیوانی خۆی بۆ ڕاگەیاند و ئەمڕۆش هەریەک لە مەسرور بارزانی، سەرۆکی حکومەتی هەرێم و مەسعود بارزانی، سەرۆکی پارتی دیموکراتی کوردستان، پشتیوانیان لە کازمی کرد، لەکاتێکدا کازمی هیچ بەرنامەیەکی کابینەکەی ئاشکرا نەکردووە. ،

"پشتیوانی کورد زوو بوو بەڵام دەکرێت ڕێککەوتنی ژێربەژێر کرابێت"

،   ئەبوبەکر کاروانی، نوسەر و سیاسەتمەدار بە ناس کوردی ڕاگەیاند: "دەتوانین بڵێین پشتگیریکردنی سەرکردایەتی کورد بۆ مستەفا کازمی زوو بوو پێش ئەوەی هیچ بەرنامەیەکی کابینەکەی ئاشکرا کردبێت، چونکە دەبوو کازمی بەرنامەی خۆی ئاشکرا بکردایە، ئەوکات کورد بڕیاریبدایە". ، وتیشی: "بەڵام دەکرێت ڕێککەوتنی پێش وەختە و ژێربەژێر کرابێت لەنێوان کازمی و هەندێک لایەنی کوردی و ئەوانەی کورد دەیەوێت لەو ڕێککەوتنەیا دەستی خستبێت بۆیە هەرزوو پشتیوانی بۆ دەربڕدرا". ، کاروانی ئاماژەی بەوەشکرد، لایەنێکی دیکەشی ئەوەیە کە ڕەنگە ئەوە وەک دەستپێشخەرییەکی سیاسی بێت و هەر لە سەرەتاوە ئەو کارەیان کردبێت و یارمەتی بدەن بۆ ئەوەی لالێکردنەوەیەکی باشتری بۆ داخوازییەکانی کورد هەبێت، دەشڵێت: "لە هەموو حاڵەتێکدا خۆ ناکرێت بە بەلاش و بێ بەرامبەر پشتیوانی لە هیچ کەس بکەن". ،

دەبێت داواکارییەکانی کورد چی بن لە کازمی؟

، ئەبوبەکر کاروانی ئاماژەی بەوەکرد: "بەداخەوە هەرێمی کوردستان سەربەخۆیی بڕیاری خۆی لەدەستداوە بەوەی موچەی لە بەغداوە بۆ دێت، بۆیە زۆر گرنگە کێشەی موچەی فەرمانبەران چارەسەر بکرێت، نەک هەر موچە، بەڵکو لەسەر کۆی گشتیی بودجە و لێکتەیگشتن لەسەر کێشەکانی تایبەت بە نەوت". ، "لێکتێگەیشتن لەسەر ناوچەکانی دەرەوەی ئیدارەی هەرێم کە ئێستا لە دۆخێکی خراپی ئەمنیدان دەبێت یەکێک بێت لە داوا سەرەکییەکانی کورد کە بە هاوبەشی بەڕێوەببرێن و وەک ئێستا نەمێننەوە، ئەو دوو خاڵە زۆر گرنگن"، ئەبوبەکر کاروانی وادەڵێت. ، هاوکات دەربارەی ئەوەی دەکرێت دیاریکردنی ناوی وەزیرەکانی کورد بکرێتە کێشە وەک لەگەڵ محەمەد تۆفیق عەلاوی ڕوویدا، کاروانی باسی لەوەکرد: "ئەو بیانوەی لایەنە کوردییەکان تا ئەو شوێنە ڕاستە ئەگەر لە بەغدا بیانەوێت قەوارەی هەرێمی کوردستان تێپەڕێنن و وەک پارێزگا مامەڵە لەگەڵ هەرێم بکەن و حساب بۆ تایبەتمەندی هەرێمی کوردستان نەکەن، کورد نابێت ڕازی بێت".. ، ڕوونیشیکردەوە: "بەدەر لەوە ئەگەر ئەو تایبەتمەندییانەی هەرێمی کوردستانیان پاراست، دەبێت کورد کراوە بێت و بەشێوەیەک مامەڵە بکەن و لەسەر گەیاندنی زۆرترین سود بە کورد مامەڵە بکەن لەسەر دانانی بەرپرسە کوردەکان لە بەغدا". ،

بوونی کەسێکی هەواڵگری بە سەرۆکی حکومەت عێراق بەرەو کوێ دەبات؟

، مستەفا کازمی، کەسێکی هەواڵگرییە و سەرۆکی دەزگای هەواڵگری عێراق بووە، هەندێک پێیانوایە ئەوە عێراق دەگەرێنێتەوە سەردەمی دەسەڵاتی سەربازی. ، لەوبارەیەوە ئەبوبەکر کاروانی ئاماژەی بەوەکرد: "دۆخی عێراق دۆخێكی لێکهەڵوەشاوە، ئاساییە بەشێک لە چاوەڕوانییەکان لە کەسێکی بەهێز بێت، بۆ ئەوەی جۆرێک لە کۆنتڕۆڵی ئەو فەوزایەی عێراق بکات، بەتایبەت کە میلیشیای چەکدار دەرەوەی دەسەڵاتی دەوڵەت چالاکییان هەیە". ، باسی لەوەشكرد، هەروەها ناڕەزایەتییەکی زۆر لە شەقام هەیە کە داوای لابردنی هەندێک سیاسیی شکستخواردوو دەکەن، ئەوەش لەڕێگەی کەسێکی بەهێزەوە دەکرێت، هەرچەن نازانن کە کازمی بەوشێوەیە بەهێزە یاخود نا.

کەناڵی ناس کورد لە تێلیگرام جۆین بکە