گه‌ڕان

Shadow Shadow
سیاسه‌تی

داوای كردوە كە مەترسى هەڵوێستەكە لەبەرچاو بگرن

ناوەڕۆکی ئەو نامەیەی کە بەرهەم ساڵح پێش ڕاسپاردنی زورفی بۆ لایەنە شیعییەکانی نارد

2020.03.17 - 21:53
ناوەڕۆکی ئەو نامەیەی کە بەرهەم ساڵح پێش ڕاسپاردنی زورفی بۆ لایەنە شیعییەکانی نارد
ناس کورد- دەقى نامەكەى بەرهەم ساڵح، سەرۆككۆمارى عێراق بۆ هێزە سياسيیەكان ئاشكرا كرا كە پێش ڕاسپاردنى عەدنان زورفى بۆ پێكهێنانى حكومەت ئاراستەى كردبوون و تێيدا هۆشدارى پێدابوون لە رێكنەكەوتن لەسەر بەربژێرێک. . لەنامەكەى سەرۆك كۆماردا هاتووە: "وەك لەنامەكەى پێشودا كە لە ڕۆژى 10ى ئازارى 2020 ئاماژەى پێدرابوو سەبارەت بە پێكهێنانى حكومەتى داهاتوو، تەئكيد دەكەينەوە لەسەر گرنگى يەكلاكردنەوەى پاڵێوراوێك تا ڕۆژى دووشەممە (16\3\2020) ئەوەش لەڕێگەى ڕێکكەوتنى لایەنە تايبەتمەندەكان بۆ دياریكردنى پاڵێوراوێكى قبوڵكراوى نيشتمانى و شەعبيەوە". . ئەوەش هاتوە، ئەگەر لایەنەکانی پەرلەمان لە پێش كۆتايى هاتنى ماوەى دەستورى نەيانتوانى لەسەر كەسێك ڕێكبكەون ئەوە سەرۆككۆمار لەبەردەم دوو بژاردەدا دەبێت كە يەكيان دەستوريە ئەويش بە ڕانەسپاردنى هيچ كانديدێك، ئەوى تريش سياسيیە بە ڕاسپاردنى كەسێك لە دەرەوەى ڕێکكەوتنى چاوەڕوانكراو. . سەرۆككۆمار داواشى كردوە كە مەترسى هەڵوێستەكە لەبەرچاو بگرن و ڕێكکەوتنێكى پەرلەمانى داواكراو بكەن، ئەوەش بۆ ئەوەى ناچار نەبێت پەنا بۆ ئەركە دەستوريەكەى ببات و كەسێك دوور لە ڕێكکەوتنى پەرلەمانى ڕاسپێرێت، چونكە ئەوە گرێكوێرەى سياسى بەدوادا دێت لەكاتێكدا وڵات پێويستى بەوەيە كە هەمووان يەكڕيز بن بۆ بەرەنگاربونەوەى ئەو ئاڵەنگارییە كە ئێستا هەيە. .   ئەمڕۆ سێشەممە بەرهەم ساڵح، سەرۆككۆمارى عێراق عەدنان زورفى، سەرۆكى فراكسيۆنى نەسرى لەپەرلەمانى عێراق ڕاسپارد بۆ پێكهێنانى حكومەتى داهاتوو، بەڵام ناوبراو لەلايەن فراكسيۆنى فەتح كە يەكێكە لە گەورەترين فراكسيۆنەكانى پەرلەمان ڕەتدەكرێتەوە، ئەوەش سەرەڕاى ڕەتكردنەوەى لەلايەن خۆپيشاندەرانى عێراقەوە و بەشێكى زۆرى فراكسيۆنەكانى دیکەش، هەروەها لایەنە کوردییەکانیش دەڵێن، چاوەڕێى بەرنامەى حكومى ناوبراو دەكەن بۆ ئەوەى بۆچونى خۆيان بدەن لەسەرى.